Ahmetaj në Himarë: Investimet në Unazën e Jugut, 250 milionë euro

Investimet në “Unazën e Jugut”, që mbulojnë zonat turistike Himarë-Dhërmi do të kapin vlerën në total të 250 milionë eurove. Bashkia vendore e Himarës do të kryej këto investime në përmirësimin e infrastrukturës kryesore e dytësore, ndriçimit, kanalizimeve e ujërave të zeza, menaxhimit të mbetjeve, sistemimin e parkimeve, etj.

“Është një projekt shumë i madh rreth 74 milion dollarë që vjen nga Banka Botërore, që po investohet në Unazën e Jugut, ku përfshihet gjithë kjo zonë. Projekti tjetër është projekti i Bankës Botërore, po me të njëjtën logjikë, por me këto rrugët që i quajmë rajonale, rrugë dytësore. Pra, jo rrugët kryesore, por rrugët dytësore. Ka dhe një projekt tjetër po në të njëjtën paketë, që është midis BERZH-it dhe Komisionit Europian, 60 milion euro është kredi dhe 40 milion euro është grant që na e jep Komisioni Europian po për të njëjtën gjë. Paketa e gjithë shkon tek 250 milion euro”, tha ministri i Ekonomisë dhe Infrastrukturës Arben Ahmetaj, gjatë takimit me sipërmarrës në këtë zonë.

Ahmetaj tha se brenda qeverisë po diskutohet gjithashtu propozimi që nga viti i ardhshëm të ketë një fond parapërgatitor për bashkitë, për turizmin, për shërbime që fillojnë nga pastrimi e ndriçimi deri tek nevojat e infrastrukturës së vogël.

Duke folur për turizmin, ministri deklaroi se sektori këtë vit po tregon ritme shumë pozitive, duke iu afruar nivelit dy-shifror. Në përgjigje të sfidës së rritjes së shifrave, ai tërhoqi vëmendjen në dy elementë kryesorë, formalizimi dhe cilësia e shërbimeve.

“Siç e shikoni, qeveria i ka dhënë një rëndësi të veçantë formalizimit të ekonomisë. Brenda formalizimit të ekonomisë, unë patjetër i vë theksin gjithë përgjegjësive tatimore që kanë bizneset e zonës, por edhe detyrimin për të regjistruar punonjësit. Pjesa tjetër ka të bëjë drejtpërsëdrejti me shërbimet që afrohen në territor nga sipërmarrjet tuaja, sidomos në një periudhë ku turizmi është kthyer në furnizuesin kryesor ekonomik të zonës”.

E.Z/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.