Aksioni i radhës, Ahmetaj: Bizneset e mëdha, deklarim të plotë të punonjësve

Kompanitë e mëdha shumë shpejt do të jenë në sitën e qeverisë, pasi nuk deklarojnë punonjësit e tyre ose në rastin më të keq i deklarojnë me pagë minimale. Këtë deklaroi ministri i Financave dhe Ekonomisë Arben Ahmetaj gjatë një takimi me bizneset, ku u bëri thirrje të vetëkorigjojnë veten.

“Bilancet e bizneseve të mëdha do të jenë aksioni i radhës. Shumë biznese nuk i deklarojnë të gjithë punonjësit, ose deklarojnë ekonomistin apo inxhinierin me 270 mijë lekë të vjetra. Biznesi duhet ta vetëkorigjojë veten. Në rast se nuk reagon pas thirrjes do të zbatohet ligji”.

Ministri tha se një tjetër betejë e qeverisë është papunësia, ndërsa shtoi se në mandatin e parë qeveria ka hapur 260 mijë vende pune.

“Në katër vite qeveria ka hapur dhe formalizuar 260 mijë vende pune, por papunësia mbetet ende një betejë për qeverinë. Aktualisht janë 36 mijë vende të lira pune, ku kërkohen profesionistë”.

E.Z/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.