Aktivitetet kriminale me më shumë sekuestrime – 232 pasuri të bllokuara narkotrafikantëve, pasojnë aktakuza e vrasjes dhe grupit të strukturuar

Por cili ka qenë lloji i aktivitetit criminal që ka gjeneruar më shumë të ardhura, të cilat janë përkthyer më pas në blerje pasurish apo investime të ndryshme. Pasuritë e krijuara përmes prodhimit dhe shitjes së lëndëve narkotike zënë edhe vendin e parë të sekuestrimeve apo konfiskimeve për vitin 2021.

Sipas të dhënave zyrtare të Agjencisë së Administrimit të Pasurive të Konfiskuara e të konfiskuara rezultojnë në total 232 pasuri të bllokuara në bazë të akuzës së trafikut të lëndëve narkotike. Vendi I dytë I përket personave nën aktakuzën e vrasjes me dashje, të cilëve u janë bllokuar në total 54 pasuri. Personat me aktakuzën e grupit të strukturuar criminal janë një tjetër segment të cilëve u është vënë nën sekuestro apo u janë konfiskuar në total 45 pasuri. 19 pasuri ta kapura gjatë vitit 2021 u përkasin individëve nën aktakuzën e shfrytëzimit të prostitucionit.

Në listë nuk mund të mungonin edhe pasuritë e korrupsionit. Agjencia raporton se janë 15 pasuri të bllokuara me këtë aktakuzë.

Përveç pasurive të paluajtshme, rezulton se ndër asetet e sekuestruara e të konfiskuara gjenden edhe shumë automjete. Agjencia e Administrimit të Pasurive të Konfiskuara e të Sekuestruara raporton se një pjesë e tyre u kanë kaluar në pronësi disa institucione, siç janë Drejtoria e Përgjithshme e Parandalimit të Parave, SPAK, Drejtorisë së Shërbimeve Qeveritare, por edhe ministrive.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.