Ambasadori gjerman Zingraf: Inkurajoj zyrtarët dhe ligjbërësit që të marrin seriozisht shqetësimet e komunitetit të biznesit!
Në pritjen e përvitshme që u zhvillua nga Shoqata Gjermane e Industrisë dhe Tregtisë në Shqipëri (DIHA) në prani të Presidentes së DIHA-s, Stephanie Sieg dhe Ministres së Financave dhe Ekonomisë, Anila Denaj si dhe organizatave anëtare të DIHA-s, Ministra, Kryetarë të Komisioneve Parlamentare dhe organizatave ndërkombëtare, Ambasadori Peter Zingraf theksoi rëndësinë e vazhdimit të reformave në kuadër të përmirësimit e kushteve ekonomike si bazë për nxitjen e investimeve.
“Çdo investitor i mundshëm do të marrë vendimin final për të investuar vetëm nëse ai/ajo është i/e sigurt që do të gjejë një mjedis të favorshëm biznesi. Mënyra për të ecur përpara me bisedimet e pranimit në BE përfshin pikërisht elementet që janë thelbësore për çdo investitor, për krijimin e më shumë historive të suksesit dhe, rrjedhimisht, për zhvillimin ekonomik të Shqipërisë.
Për vitin 2020 do të doja të inkurajoja të gjithë zyrtarët qeveritarë dhe ligjbërësit që të vazhdojnë në rrugën e reformave dhe të marrin seriozisht shqetësimet e komunitetit të biznesit” është shprehur ambasadori, referuar njoftimit zyrtar.
DIHA ka vënë si qëllim përmirësimin e kushteve ekonomike për më shumë investime dhe lehtësim të tregtisë si dhe zgjerimin e mëtejshëm të marrëdhënieve dypalëshe ekonomike midis Shqipërisë dhe Gjermanisë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.