AMF nënshkruan Memorandum Bashkëpunimi me INSTAT – Synohet rritja e performancës së funksionimit të Sistemit Kombëtar Statistikor

Autoriteti i Mbikëqyrjes Financiare dhe Instituti i Statistikave nëpërmjet një faqe zyrtare ka bërë me dije se kanë nënshkruar Memorandumin e Bashkëpunimit, i cili përcakton përgjegjësitë në funksion të shkëmbimit të informacionit dhe transmetimit të të dhënave për Programin e Statistikave Zyrtare.

Memorandumi i Bashkëpunimit u nënshkrua nga Drejtori i Përgjithshëm Ekzekutiv i AMF-së, Ervin Mete dhe Drejtoresha e Përgjithshme e INSTAT, Elsa Dhuli. Marrëveshja synon të rrisë performancën e funksionimit të Sistemit Kombëtar Statistikor, duke rregulluar mënyrën e organizimit të punës, transmetimit të statistikave dhe të dhënave të ndryshme, si edhe detyrimet e ndërsjella institucionale në kuadër të këtij bashkëpunimi.

Palët do të bashkëpunojnë gjithashtu në hartimin e planeve të punës në fushën e statistikave, përmirësimin e metodave dhe teknikave ekzistuese në mbledhjen dhe përpunimin e të dhënave, si edhe në shkëmbimin e rregullt të dokumentave formalë e teknik.

AMF dhe INSTAT bien dakord të bashkëpunojnë për realizimin e anketave dhe vrojtimeve statistikore të bizneseve dhe qytetarëve për tregjet nën mbikëqyrjen e Autoritetit, në funksion të mbrojtjes së interesave të konsumatorëve/investitrorëve, si edhe nxitjes së transparencës, besueshmërisë dhe qëndrueshmërisë në këto tregje.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.