Bashkia e Kamzës fal taksat dhe tarifat e prapambetura për 7 mijë e 638 familje!
Bashkia e Kamzës ka miratuar vendimin për faljen e detyrimeve të prapambetura të taksave dhe tarifave për 7 mijë e 638 familje. Vendimi përcakton se falja bëhet për detyrimet e papaguara deri në vitin 2010. Referuar njoftimit zyrtar, kryetari i Bashkisë Kamëz, Rakip Suli në kuadër të luftës ndaj COVID 19, ka qenë në terren duke iu ofruar ndihmë konkrete dhe konstatuar nga afër gjendjen e tyre.
Ky vendim vjen pas vendimeve të tjera të përcaktuara në paketën e re fiskale te vitit 2020. Në këtë paketë, për shtresat në nevojë si invalidët e punës, të verbërit, para-tetra plegjikët, kryefamiljarët, gratë me mbi dy fëmijë dhe të paaftët e vetmuar, sot paguajnë 30% të paketës familjare nga 6000 (në vitin 2019) në 1800 lek (në vitin 2020). Po ashtu, pensionistët paguajnë nga 6000 (në vitin 2019) në 1200 lek (në vitin 2020).
Po ashtu, në kuadër të masave mbështetëse për kapërcimin e pasojave të COVID-19, janë marrë masa si shtyrja me 2 muaj e pagesave të detyrimeve bashkiake (taksa dhe tarifa vendore) për bizneset dhe heqja e pagesës së hapësirës publike për subjektet tregtare për 3 muaj.
Me këto vendime të Këshillit Bashkiak, Bashkia Kamëz në kuadër të situatës së krijuar shpreson t’i vijë në ndihmë subjekteve tregtare në territorin e saj.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.