Borxh për të ngrënë e riparuar shtëpitë! – Si ndikoi tërmeti dhe pandemia tek familjet shqiptare
Afro 23 për qind e familjeve shqiptare deklarojnë se kanë një hua për të paguar. Referuar vrojtimit të Bankës së Shqipërisë për 6-mujorin e parë të vitit, duket se tërmeti i 26 Nëntorit dhe pandemia Covid-19 kanë dhënë efektet e veta në këtë drejtim. Kështu, në 32 për qind të rasteve, huaja është marrë për konsum, çka reflekton papunësinë dhe rënien e të ardhurave gjatë kësaj periudhe, në 36 për qind për blerje dhe riparim prone dhe 10 për qind të rasteve për zhvillim biznesi.
Pesha e rasteve të huamarrjes për ‘blerje/riparim prone’ ka rezultuar në rritje në gjysmën e parë të vitit, po ashtu krahasuar dhe me një vit më parë. Në rreth 37% të rasteve të raportuara, huamarrja e familjeve rezulton në formën e ‘kredisë nga institucione financiare’ dhe në rreth 45% të rasteve, në formën e ‘parasë në dorë’, duke shënuar rritje me 3 pp krahasuar me 6-mujorin e kaluar. Sipas vrojtimit të Bankës së Shqipërisë, peshë të konsiderueshme vijon të ketë zëri ‘mall i papaguar’ rreth 18% e rasteve të huamarrjes.
Sa i takon nivelit të shpenzimeve të domosdoshme gjatë kësaj periudhe, duket se familjet shqiptare kanë ulur ndjeshëm ritmin. Kështu, rreth 53% e tyre deklarojnë shpenzime mujore në nivelin ’20-50 mijë lekë’ dhe kjo peshë ka rënë 4 pp krahasuar me 6-mujorin e kaluar, ndërkohë që rreth 20% deklarojë shpenzime në nivelin ’10-20 mijë lekë’ dhe kjo peshë është rritur gjatë periudhës me 3 pp.
Të dy indekset rezultojnë në rënie në terma vjetorë dhe sipas Bankës së Shqipërisë, kjo ecuri e të ardhurave dhe shpenzimeve të familjeve, mund të jetë reflektim i fillimit të materializimit të rënies ekonomike në vend gjatë këtij viti si pasojë e dy goditjeve të forta, tërmetit të nëntorit të vitit të kaluar dhe pandemisë Covid-19.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.