“Çmimi i naftës, qeveria pjesë e përcaktimit ditor” – Rama: Bord i përbashkët administrimi me furnizuesit. Do të tregtoni pa asnjë fitim!

Çmimet e tregtimit me pakicë të karburanteve do të vendosen çdo ditë nga Bordi i Administrimit, që do të ngrihet brenda 24 orësh e që do të ketë në përbërje 5 përfaqësues institucionesh publike dhe 5 përfaqësues nga furnizuesit e karburanteve, që operojnë në vendin tonë. Gjatë një takimi me këta të fundit, kryeministri Edi Rama tha se nëse do të konstatohen tabela me çmime të ndryshme nga përvaktimet e bordit, pika e karburantit do mbyllet.

Paralelisht, bordi që do të ngrihet do të nisë kontrollet në terren për gjendjen faktike të depozitave të sigurisë, që përcakton legjislacioni në fuqi.

Gjithashtu, operatorëve që merren edhe me tregtimin e karburantit, duke e importuar e më pas duke eksportuar, iu kërkua të ndalojnë eksportet dhe të rishikojnë kontratat e nënshkruara. Ndërsa, paralelisht Rama tha se këto biznese nuk do të kenë të drejtë të nxjerrin asnjë fitim përgjatë një periudhe, të paktën 3 mujore.

Këto masa vijnë pas protestave të 2 ditëve të fundit të mbajtura nga qytetarët, si pasojë e rritjes së çmimit të karburantit dhe çmimeve të ushqimeve. Ndësa tregojnë një ndryshim kursi të qeverisë, që deri para disa ditësh theksonte se çmimet I vendos tregu, ndërsa rritja ka ardhur si pasojë e luftës Rusi-Ukrainë.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.