Çuçi takim me homologen britanike Patel – Në diskutim operacionet e përbashkëta kundër krimit të organizuar dhe emigracioni

Nëpërmjet një njoftimi të publikuar në faqen zyrtare të Ministrisë së Brendshme është bërë me dije se Ministri Çuçi ka patur një vizitë zyrtare në Britani, ku ka mbajtur një takim me homologen Patel në lidhje me operacionet e përbashkëta në hetimet kundër krimit të organizuar.

“Falë besimit dhe përkushtimit të dyanshëm, Shqipëria dhe Britania e Madhe i kanë kapacitetet për ngritjen e skuadrave të përbashkëta hetimore dhe operacionale. Luftën kundër krimit të organizuar nuk e bëjmë dot veçmas, prandaj duhet të bashkërendojmë përpjekjet dhe resurset tona në çdo kohë”, është shprehur ministri Çuçi.

Temë tjetër e diskutimit ishte edhe emigracioni i paligjshëm, për të cilin ministri Çuçi shprehet se ky problem nuk mund të adresohet pa përmirësuar kushtet e emigracionit të ligjshëm.  “Diskutuam gjithashtu edhe për emigracionin e jashtëligjshëm, i cili kurrsesi nuk mund të adresohet si problem pa përmirësuar kushtet e emigracionit të ligjshëm. Në këtë pikë i kërkova homologes britanike të rishikojë edhe njëherë regjimin e trajtimit të shtetasve shqiptarë që jetojnë e punojnë në Britaninë e Madhe, për t’i lehtësuar në raport me mundësi të reja punësimi apo lëvizjet sezonale. Në këtë pikë gjeta mirëkuptimin e saj të plotë duke më shprehur gjithashtu angazhimin për të bërë gjithçka duhet për integrimin e tyre”, thotë më tej ministri Çuçi.

Ministri i Brendshëm vlerëson gjithashtu mbështetjen britanike për reformimin e Institutit të Policisë Shkencore.  “Asistenca britanike për Institutin tonë të Policisë Shkencore është një ndihmë që ne e çmojmë shumë. Me reformimin e këtij institucioni dhe adaptimin e teknologjisë e metodave moderne, do të plotësojmë një nga hallkat më kritike të zinxhirit të hetimit dhe dokumentimit të ngjarjeve kriminale në vend”, shprehet Çuçi.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.