Dëmet në shkolla, 83 milion euro – Debate për ekspertimet/ Dhimitri: Pse s’i bëni publike?! Shahini: I kanë vetëm bashkitë

83 milion euro është vlera që do të nevojitet për ndërhyrjet në shkollat e dëmtuara nga tërmeti i 26 nëntorit. Ndërkohë që, 12 milion euro të tjerë është kosto për trajnimet e mësuesve për një periudhë 5-vjeçare. Shifrat u bënë me dije nga ministrja e Arsimit, Sportit dhe Rinisë, Besa Shahini gjatë raportimit të Komisionin parlamentar të Edukimit, ku gjithashtu njoftoi që në plan afatgjatë parashikohet edhe përforcimi i shkollave, me qëllim parandalimin e dëmeve në lëkundje të tjera.

Ndërkaq, kryetarja e komisionit, Fatjona Dhimitri deklaroi se informacioni që i është vënë në dispozicion komisionit është i paplotë, ndërsa Shahini deklaroi se aktet e ekspertimit i kanë bashkitë, duke shtuar se ministria vetëm sa është njohur me to.

Komisioni vendosi se do të zhvillojë një seancë të dytë me ministren, ndërkohë që deputeti Musa Ulqini kërkoi që të hartohet edhe një listë me emrat e kompanive që kanë kryer punimet në shkolla, por që u dëmtuan nga tërmeti si dhe sugjeroi gjetjen e mekanizmave që këto kompani të përjashtohen nga marrja e tenderëve publikë.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.