Dëmet nga dermatoza nodulare, Panariti: Në Prill përmbyllim kompensimin e të gjithë fermerëve

Ministri i Bujqësisë Edmond Panariti ishte sot në Elbasanit për shpërndarjen e 80 lopëve të para në këtë qark, pas dëmeve që iu shkaktuan fermerëve nga sëmundja e dermatozës nodulare, apo e njohur ndryshe si sëmundja e gjedhit.

Ministri Panariti në një prononcim për mediat u shpreh se kompensimi i fermerëve do të mbyllet brenda muajit Prill.

“Çdo krerë bagëtie do të zëvendësohet kokë më kokë me lopë të racës. Po vazhdojmë në Elbasan me kompensimin e plotë të dëmeve të shkaktuara nga dermatoza nodulare. Ato janë lopë race, të certifikuara apo të importuara nga Danimarka, të cilat japin një rendiment mesatar të qumështit me 20 litra në ditë. Si të thuash ne nuk po zëvendësojmë 1 me 1. Po zëvendësojmë 2 lopë për një, sa i takon rendimentit, pasi lopët që u dëmtuan jepnin 8 litra qumësht në ditë. Operacionin do ta mbyllim brenda Prillit, pra fermerët do të marrin lopët e racës brenda kësaj periudhe”, tha Panariti.

Kreu i Bujqësisë ka bërë edhe një tjetër premtim për blegtorinë: “Ne nuk do të ndalemi me aq. Do punojmë për përmirësimin e strukturës së blegtorisë, madje do vazhdojmë me të imtat dhe kafshët që mbarështohen këtë periudhë”, përfundoi Panariti.

Osman Dedja/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.