Ekonomia më mirë sesa pritej, kredia rritje 7.7% – Prill-qershor, portofoli u shtua me 150 milionë dollarë, drejt ritmeve të para pandemisë

Rimëkëmbja më e shpejtë nga pritshmëritë e ekonomisë nga dy goditjet, tërmeti e Pandemia, është reflektuar në mënyrë mjaft të dukshme te kreditimi I sektorit privat, ku portofoli është zgjeruar me rreth 150 milionë dollarë. Banka e Shqipërisë raporton trajektore pozitive të rritjes edhe gjatë tremujorit të dytë, ku norma vjetore e rritjes së portofolit të kredisë, mesatarisht prej 7.7%, është lehtësisht më e lartë se tremujori i parë 2021. Për më shumë, në terma tremujorë, zgjerimi i portofolit me 15 miliardë lekë ka reflektuar përmirësimin sezonal në tremujorin e dytë, duke iu rikthyer ritmeve të rritjes së periudhës para pandemisë. Rikthimi në normalitet i ekonomisë, mbas heqjes së kufizimeve dhe ecurisë së mirë të vaksinimit, aktiviteti i shtuar i sektorit publik, si dhe përmirësimi i ofertës së kredisë janë faktorët kryesorë që kanë mbështetur këtë ecuri.

Megjithatë, thekson Banka e Shqipërisë, në ndryshim nga tremujori I parë i vitit, rritja e kreditimit është mbështetur më shumë tek financimi i individëve. Portofoli i kredisë për këtë segment u rrit mesatarisht me 8.7% krahasuar me vitin e kaluar, ose rreth 2.6 p.p. më shumë se rritja në tremujorin e parë. Kredia për blerje banese ka dhënë kontributin kryesor në këtë përmirësim. Rritja vjetore e këtij portofoli me 11.1% është 2.7 pikë përqindje më e lartë se ajo e tremujorit të parë, duke konfirmuar trajektoren pozitive të nisur që para një viti.

Tendenca rritëse e çmimeve të pasurive të paluajtshme, së bashku me kushtet financiare të favorshme janë shoqëruar si me rritjen e kërkesës për financim të blerjeve të banesave pranë bankave, ashtu edhe me përqasjen më lehtësuese të tyre për këtë segment. Gjithashtu, edhe kredia konsumatore ka shfaqur një përmirësim të qëndrueshëm prej vjeshtës së vitit të kaluar, duke shënuar një zgjerim vjetor mesatar rreth 5.4% në tremujorin e dytë 2021.

Kredia për biznese, me një rritje vjetore prej 7.1%, vijon të mbështet nga norma të larta të rritjes së kredisë për investim. Norma e rritjes së kësaj kredie prej 11.6%, shfaqet e qëndrueshme dhe në linjë me rigjallërimin e aktivitetit ekonomik dhe forcimin e besimit. Ajo ka balancuar disi ngadalësimin e ritmeve të rritjes të kredisë për likuiditete. Ky ngadalësim reflekton më së shumti një kërkesë më të ulët të bizneseve për likuiditet – e lidhur me rritjen e vëllimit të xhiros në ekonomi dhe pagesat e bëra nga qeveria.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.