Energjia, nuk ndalet rritja e çmimit – Tjetër rekord / Mbi 185 euro për 1 MWh, vitin e kaluar u ble me rreth 68 euro/MWh
Prej disa muajsh, çmimi me të cilin Furnizuesi i Tregut të Lirë po siguron energjinë për plotësimin e nevojave konsumatore, ka vetëm tendencë në rritje, ndërkohë që energjia e blerë për muajin shtator ka shënuar një tjetër rekord. Kjo edhe në raport me blerjet e kryera gjatë muajit gusht, që gjithsesi shënoi vlera tejet të larta. Gjatë muajit shtator, FTL ka realizuar 2 procedura blerjesh, ku në njërën prej tyre është paguar 185.87 euro/ MWh. Në total, në 2 procedurat e blerjes së energjisë janë shpenzuar 11.79 mln euro, për sasi energjie që do të duhet të lëvrohen deri në datën 19 shtator.
Në krahasim me shtatorin e vitit të kaluar, çmimi është disa fish më i lartë, pasi në të njëjtën periudhë të një viti më parë energjia u ble me një çmim prej rreth 68 euro/mwh. Ndërkohë që, gjatë procedurave të blerjes së energjisë në muajin gusht çmimi me të cilin u sigurua energjia kapi vlerat e rreth 160 euro/ mwh, ndërsa për korrikun çmimi mesatar me të cilin u sigurua energjia ishte 106 euro/MWh. Blerjet e energjisë u rikthyen me ardhjen e verës dhe mungesën e rreshjeve të shiut, por ndryshe nga vitet e kaluar, çmim është disa fish më i lartë.
Paralelisht, bursa e energjisë që parashikohet të sjellë çmime më të ulta nuk është ngritur ende, ndonëse ajo duhej të ishte gati prej kohësh. Aktualisht, ngritja e platformës Tenderi për ngritjen e Platformës Elektronike të Tregtimit për Tregun e Ditës në Avancë dhe atë Brenda Ditës është ende në fazë tenderimi, teksa procedura ka përfunduar pranë Komisionit të Prokurimit Publik, pas një ankese të depozituar nga kompania sllovake “Sfera”, që akuzon autoritetin kontraktues për kritere diskriminuese dhe përjashtuese.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.