Ere “rrëzon” OSSH-në për vjedhjen e energjisë – OSSH kërkonte penalizime për ndërhyrjet në bokset kolektive
Enti Rregullator i Energjisë ka rrëzuar për herë të dytë kërkesën e Operatorit të Sistemit të Shpërndarjes, që kërkonte penalitete për klientët në rast të ndërhyrjeve të paligjshme në sistemin e matjes në bokse kolektive, pra jo vetëm në bokset individuale, për përdoruesit e rrjetit me linjë të dytë në bokse kolektive apo përdoruesit e lidhur në rrjet pa kontratë. OSSH kërkonte ndryshime në rregulloren, ku parashikohet se kushdo që vjedh energjinë elektrike penalizohet me ‘gjobë kilovatësh” apo thënë ndryshme , sasia e energjisë e konsumuar në formë të paligjshme, konvertohet në lekë dhe faturohet.
Në kërkesën e dytë për rishikimin e rregullores OSSH theksonte se e çmon si të papërshtatshëm përjashtimin e abonentëve në Bokse Kolektive nga aplikimi i Dëmit Ekonomik pasi kjo sjell: Nxitjen dhe jo frenimin e trendit të ndërhyrjeve/rilidhjeve të paligjshme të përdoruesve të rrjetit; nuk ndihmon në reduktimin e humbjeve jo-teknike dhe nuk ndihmon për disiplinimin e sjelljes së përdoruesve të rrjetit. Por, ERE nuk i ka marrë në konsideratë këto argumente, duke rrëzuar këkresën e OSSH-së.
Sipas rregullores, çmimi me të cilin faturohen klientët që vjedhin energjinë elektirke, përllogaritet mbi bazën çmimit mesatar për këh, të blerë për mbulimin e humbjeve në periudhën që do të faturohet dëmi ekonomik, kostot e transmetimit dhe kostot e rrjetit në të cilin është kyçyr përdoruesi për secilën kategori të tij. Rregullorja i jep të drejtë çdo përdorues i rrjetit për t’u ankuar pranë OSSH apo ERE-së, në rast se kundërshton faturën e dëmit ekonomik të vendosur nga OSSH, ose pretendon se kjo e fundit nuk ka ndjekur dhe zbatuar rregulloren.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.