Fatkeqësia Natyrore/ Nga kontrolli në banesë te ndalesa e grevave! Cilat të drejta do t’u preken qytetarëve. 4 nenet e Kushtetutës që kufizohen
Qeveria ka shpallur gjendjen e fatkeqësisë natyrore, duke parashikuar ndër të tjera kufizimin e disa të drejtave kushtetuese.
Referuar vendimit, kufizohen të drejtat e garantuara nga nenet 37, 38, 41, pika 4, 49 dhe 51 të Kushtetutës deri në masën që konsiderohet e domosdoshme për të arritur ruajtjen e shëndetit të shtetasve.
Por cfarë të drejtash kushtetuese u kufizohen qytetarëve?
Neni 37
Paprekshmëria e banesës është e garantuar
Kontrollet e banesës, si dhe të mjediseve që njësohen me të, mund të bëhen vetëm në rastet dhe në mënyrat e parashikuara me ligj.
Askujt nuk mund t’i bëhet kontroll vetjak jashtë procesit penal, me përjashtim të rasteve të hyrjes në territorin e shtetit dhe të daljes prej tij ose për të mënjanuar një rrezik që i kanoset sigurimit publik.
Në vendim përcaktohet se strukturat operacionale të mbrojtjes civile kanë të drejtë të organizojnë kontrolle të njëanshme të banesave dhe objekteve private për evidentimin dhe trajtimin e personave të prekur nga virusi.
Neni 38
Kushdo ka të drejtë të zgjedhë vendbanimin si dhe të lëvizë lirisht në çdo pjesë të territorit të shtetit. Askush nuk mund të pengohet të dalë lirisht jashtë shtetit.
Kufizimi i kësaj të drejtë kushtetuese nënkupton kufizimin e të drejtës së lëvizsshmërisë. Ashtu sicc parashikohet në aktin normativ të posaccëm, nuk lejohen lëvizjet në vende e oraretë caktuara,pa motive të forta.
Neni 41
Shpronësimet ose ato kufizime të së drejtës së pronës që barazohen me shpronësimin, lejohen vetëm përkundrejt një shpërblimi të drejtë.
Përmes këtij kufizimi, autoritetet marrin kompetencën që të vendosin në dispozicion godina apo mjete që u nevojiten për të përballuar emergjencën.
Neni 49
Secili ka të drejtë të fitojë mjetet e jetesës së tij me punë të ligjshme, që e ka zgjedhur ose pranuar vetë. Ai është i lirë të zgjedhë profesionin, vendin e punës, si dhe sistemin e kualifikimit të vet profesional.
Të punësuarit kanë të drejtën e mbrojtjes shoqërore të punës.
Përmes kufizimit të kësaj të drejtë kufizohet zhvillimi i aktiviteteve ekonomike për subjektet private në përputhje me nevojat e diktuara nga fatkeqësia natyrore.
Neni 51
E drejta e të punësuarit për grevë që ka të bëjë me marrëdhëniet e punës, është e garantuar.
Kufizime për kategori të veçanta të punësuarish mund të vendosen me ligj për t’i siguruar shoqërisë shërbimet e domosdoshme.
Përmes kufizimit të kësaj të drejtë kufizohet e drejta e grevës.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.