“Gati për investim” – Banka Botërore dhe Dhoma Amerikane, workshop për tregun privat të kapitaleve
Dhoma Amerikane e Tregtisë në bashkëpunim me Bankën Botërore kanë organizuar workshopin me temë “Roli që kapitalet private kanë në investimet për bizneset në Ballkanin Perëndimor, si dhe mënyrat se si Ndërmarrjet e Vogla e të Mesme mund të përfitojnë nga këto forma të reja financimi”.
Në këtë workshop u evidentua se bizneset në Shqipëri por dhe në Rajonin Perëndimor, vazhdojnë të mbështeten në forma tradicionale të financimit duke aksesuar fonde nëpërmjet sistemit bankar, linjave të kredive dhe huave të tjera financiare.
Burimet alternative të kapitalit nuk ekzistojnë dhe tregu privat i kapitalit është në një fazë zhvillimi jo vetëm në Shqipëri por edhe në rajon.
“Kjo ndodh në një kohë kur 95% e bizneseve në Shqipëri janë sipërmarrje të Vogla dhe të Mesme dhe shtylla e ekonomisë shqiptare. Ata përfaqësojnë 83% të punësimit, 75% të Prodhimit të Brendshëm Bruto por përfitojnë vetëm 28% të financimit.
Për t’i dhënë këshillën e duhur kësaj kategorie biznesi se si të përfitojë nga kapitalet në këtë treg privat në zhvillim, seminari ka përfshirë module që shpjegojnë funksionimin e këtij tregu dhe aktorët e tij, mënyrën se si hartohet dhe realizohet marrëveshja mes investitorit dhe sipërmarrësit dhe përfitimet e të dy palëve.
Nëse sipërmarrësit investojnë paratë e tyre në tregun e kapitalit, ata mund të kenë një normë më të lartë fitimi dhe mund të bëhen aksionerë të kompanive të ndryshme, ashtu sikurse mund të përfshihen në dhënie huamarrjeje ndaj bizneseve apo edhe qeverisë. Nga ana tjetër bizneset që kanë nevojë për likuiditete, mund t’i drejtohen këtij tregu privat kapitalesh duke lehtësuar buxhetet e tyre nga interesat e larta te kredive apo kolateralet e nevojshme.
Kjo marrëveshje dhe gjithë informacioni që i jep jetë një tregu të ri dhe në zhvillim të kapitaleve, ka qënë në fokus të seminarit të drejtuar nga eksperti ndërkombëtarë në fushën e investimeve me kapital privat Gavin Ryan, dhe njëkohësisht këshilltar special i Bankës Botërore dhe BERZH” evidentohet në njoftimin e shpërndarë për mediat.
Roli i këshilltarëve në fushën e financimit po merr një rëndësi të veçantë, dhe për këtë ka folur Enio Jaço, President i AmCham Albania, duke shpjeguar rolin që po ndërmerr AmCham në përmirësimin e punës midis partnerëve të ndryshëm që përmirësojnë kornizën e investimeve dhe mjedisin, që është e rëndësishme për bizneset dhe investimet e kapitalit privat.
Dhoma Amerikane ka nisur së fundmi një nismë, e cila synon përmirësimin e modelit të investimeve në Shqipëri. Jaço tha se një nga elementët kryesorë të kësaj nisme është rritja e konkurrueshmërisë, e cila lidhet fort me aksesin në kapitale.
“Ajo që i duhet ekonomisë janë alternativat e reja të financimit që mundësojnë kapitale private. Nëse krahasojmë Shqipërinë me vende të tjera të rajonit, shohim se jemi hapa prapa, në gjetjen e mënyrave të reja të financimit. Dhe një nga alternativat më të mira janë financimet me kapital privat!
Në gjithë hendekun e aksesit të këtyre financimeve ka një oportunitet të jashtëzakonshëm për gjithë profesionistët shqiptarë, që ta shohin dhe konsiderojnë tregun e kapitaleve private si një mundësi reale për tregun dhe ekonominë” u shpreh Jaço.
Banka Botërore dhe AmCham dakortësuan të eksplorojnë iniciativa të tjera më të avancuara në të ardhmen për trajnimin profesional të ekspertëve shqiptare me thithjen e kapitaleve private.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.