Gjermania rrit ndihmën për të kthyerit nga emigracioni – Grant shtesë prej 6 milionë eurosh
Qeveria shqiptare ka dorëzuar në Kuvend projektligjin për ratifikimin e marrëveshjes së grantit mes Shqipërisë dhe Gjermanisë në kuadër të zhvillimit të qëndrueshëm ekonomik dhe rajonale përmes nxitjes së punësimit dhe arsimit profesional.
Në këtë rast bëhet fjalë për një shtim të dytë fondesh, në masën e 6 milionë eurove. Projekti synon të ndihmojë personat e rikthyer në vend me vullnetin e tyre, por edhe popullsinë lokale të paemigruar.
Marrëveshja ndjek dy të mëparshmet të ratifikuara nga Kuvendi gjatë vitit të kaluar, me anë të të cilave është dakordësuar bashkëpunimi teknik mes dy qeverive për këtë program, në një vlerë totale për të dyja marrëveshjet prej 10.5 milionë eurosh.
Në këtë mënyrë, financimi nga qeveria gjermane kap vlerën e 16.5 milionë eurove.
Objektivi kryesor i programit është përmirësimi i situatës së vetëpunësimit të punës së kualikuar, veçanërisht tek të rinjtë, të cilët janë edhe shtresa më e predispozuar për t’u larguar nga vendi. Projekti do të shtrihet në të gjitha rajonet e Shqipërisë në sektorë të përcaktuar përmes ndërhyrjeve në dy drejtimeve, në ndërmarrjet mikro, të vogla dhe të mesme, si dhe projekteve për investime.
Programi synon të përfshijë rreth 20-30% të të kthyerve nga përvojat e migracionit, ndërsa financimi shtesë do të përpiqet të arrijë rezultatet e mëposhtme:
- Rreth 7000 persona do të përfitojnë nga masat kualifikuese formale dhe joformale të kualifikimit;
- Rreth 1300 do të jenë pjesëmarrës në trajnimet e sipërmarrjes;
- Rreth 20 ndërhyrje do të jenë në shkallë të vogël për përfshirje sociale.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.