Greqia shtrëngon masat kufizuese – Infektimet ditore, në nivelin më të lartë që kur filloi pandemia

Greqia ka njoftuar masa të reja kufizuese për të parandaluar përhapjen e variantit të ri të koronavirusit, të cilat do të jenë në fuqi nga 3 janari deri më 16 janar. Të hënën, autoritetet raportuan numrin më të lartë të infektimeve ditore që kur filloi pandemia, prej 9,284 raste, ndërsa 66 persona humbën jetën. Duke folur në një konferencë për mediat, ministri i shëndetësisë, Thanos Plevris, konfirmoi se autoritetet janë përgatitur për më shumë se 15,000 raste ditore, në ditët në vijim.

Gjithashtu, ministri i Shëndetësisë deklaroi se sipas masave të reja, maskat me mbrojtje të lartë do të jenë të detyruara në supermarket, në transportin publik dhe në ambiente të tjera publike. Gjithashtu, baret dhe restorantet do të mbyllen në mesnatë, ndërsa është vendosur një kufi maksimal prej 6 personash për tavolinë. “Nëse konstatojmë se këto masa nuk respektohen, ne do të ndalojmë muzikën në ambientet e argëtimit”, paralajmëroi ministri i Shëndetësisë, Thanos Plevris.

Njëkohësisht, qeveria greke vendosi të kufizojë në 10% pjesëmarrjen të ngjarjet sportimet, ose me një kapacitet prej 1,000 persona. “Po hyjmë në periudhën e përhapjes së variantit omicron në Greqi”, paralajmëroi ministri. Plevris i kërkoi njerëzve që do të mblidhen për të festuar Vitin e Ri të mbrojnë të dashurit e tyre dhe të shmangin kontaktin nëse kanë qënë të ekspozuar në tubime publike, gjatë festave. Prej disa javësh, Greqia kishte vendosur kufizime për të pavaksinuarit që përdorin ambiente të jashtme apo të brendshme. Ekspertët e shëndetësisë besojnë se omicron është më i transmetueshëm se variantet e pëtrparshme, por dy studime të fundit sugjerojnë se të prekurit kanë më pak gjasa të kërkojnë trajtim spitalor.

Klevis Llaha /SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.