Gusht, rritje modeste e qarkullimit të parasë – Tërheqjet nga atm dhe pagesat me pos, larg niveleve të para pandemisë

Muaji gusht regjistron një rritje të lehtë të transaksioneve për tërheqjen e parave cash nëpër pikat ATM në vendin tonë. Sipas të dhënave të Bankës së Shqipërisë, gjatë gushtit janë tërhequr rreth 18 miliardë lekë nga pikat e ATM-ve, nga rreth 17.2 mld lekë që ishin tërheqjet në korrik. Rritja përkthehet në 4.65% krahasuar me muajin paraardhës. Në korrik vihej re një rënie e transkasioneve në vlerë nëpër ATM, ç`ka bie ndesh me logjikën dhe tendencën e sezonit veror, kur flukset e pagesave duhet të jenë më të larta.

Gushti ka sjellë një ndryshim të tendencës, por jo në ritmet e qershorit, kur u tërhoqën 18.8 miliardë lekë. Edhe pagesat me kartë në shërbimet tregtare nëpërmjet POS janë rritur lehtë gjatë gushtit, në 2.17 mld lekë, nga rreth 1.98 miliardë lekë që ishin në korrik, në rritje me  9.6% krahasuar me muajin paraardhës. Pavarësisht rritjes, pagesat me POS mbeten ende larg niveleve të para pandemisë. Muajt janar dhe shkurt të këtij viti regjistrojnë flukse më të larta pagesash në vlerë. Edhe transaksionet nëpërmjet homebanking kanë njohur një rritje të lehtë gjatë gushtit.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.