Harrojeni WhatsApp – “Facebook Messenger” ka një avantazh më të madh
WhatsApp mund të jetë shërbimi më i madh i mesazheve në botë por Facebook Messenger mund të jetë duke e lënë në hije.
Edhe pse të dy këto shërbime janë në pronësi të Facebook, vetëm Messenger ka zbuluar një mënyrë të re për të dërguar dhe marrë fotot në formatin e fundit 4K duke mos humbur kështu rezolucionin.
Kjo do të thotë se përdoruesit marrin një përvojë shumë më të pasur dhe më të shkëlqyer.
Messenger thotë se po bën investime të konsiderueshme në mënyrën se si njerëzit komunikojnë vizualisht nëpërmjet shërbimit.
Duke folur për cilësinë e re të fotografive 4K, Sean Kelly dhe Hagen Green, Menaxherët e Produkteve të Messenger, thanë:
“Dëgjuam që njerëzit dëshirojnë të dërgojnë dhe të marrin fotografi me rezolucion të lartë në Messenger dhe duke marrë parasysh që njerëzit dërgojnë më shumë se 17 miliardë foto përmes Messenger çdo muaj, ne po përpiqemi t’i bëjmë bisedat tuaja më të pasura, më të mprehta dhe më mirë se kurrë”.
“Ne e dimë se çdo mesazh ka rëndësi për ju, pa marrë parasysh se si dhe çfarë po ndani. Ne e vlerësojmë që ju vazhdoni të përdorni Messenger për t’u lidhur me njerëzit që ju interesojnë më së shumti. ”
Që nga dita e sotme, përdoruesit në SHBA, Kanada, Francë, Britani, Australi, Singapor, Hong Kong, Japoni dhe Korenë e Jugut mund të dërgojnë foto 4K.
Me kalimin e ditëve, ky opsion i ri do të përditësohet edhe në shtetet e tjera.
Me këtë përditësim të ri aplikacioni mund të dërgojnë foto me rezolucion 4,096×4,096 gjë e cila më përpara ishte krejtësisht e pamundur.
Rrjeti social ka publikuar edhe disa shembuj ku nxjerr në pah diferencën të cilën e keni të ilustruar më poshtë.
V.H/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.