HEC Lanabregas drejt rehabilitimit dhe rritjes së kapacitetit – Do të lidhet me ujësjellësin e Gurit të Bardhë

Hidrocentrali i Lanabregasit, i ndodhur vetëm 6 kilometra larg Tiranës në fshatin me të njëjtin emër, do t’i nënshtrohet së shpejti punimeve të rehabilitimit. I vënë në shfrytëzim që nga viti 1951, ky hidrocentral ka një rëndësi të veçantë kombëtare, për shkak se kryen një funksion të dyfishtë: furnizimin me ujë të kryeqytetit dhe prodhimin e energjisë elektrike.

Uji për këtë hidrocentral vjen nga burimet ujore mbrapa Malit të Dajtit dhe transportohet përmes tubacioneve deri tek rezervuari ku dalin dy tubacionet me presion që e dërgojnë ujin në dy turbina Pelton me fuqi nga 2.5 MW. Turbinat, krahas prodhimit të energjisë bëjnë edhe shuarjen e presionit të ujit të pijshëm që furnizon Tiranën.

Gjendja e makinerive dhe pajisjeve aktualisht është shumë e dobët dhe e vjetëruar, duke bërë që hidrocentrali të komandohet manualisht nga personeli operativ dhe të mos  ketë një sistem SCADA të menaxhimit të energjisë.

Ndër variantet që sugjerohen për rehabilitimin e HEC Lanabregas, më i favorshëm është opsioni i instalimit të dy agregatëve të rinj turbinë horizontale Pelton me fuqi të instaluar rreth 3 MW secili, duke e rritur kështu kapacitetin nga 5 MW në 6 MW.

Krahas rehabilitimit dhe zëvendësimit të turbinave, ky HEC mund të shtojë edhe një turbinë të tretë, për të cilin është lënë një vend bosh gjatë ndërtimit të HEC-it. Turbina e re do të ndërlidhet me Ujësjellësin e Gurit të Bardhë, i cili është projekti prioritar i UKT për realizimin e furnizimit të Tiranës me ujë 24 orë në ditë.

Nëse zgjidhet të shtohet kjo turbinë, atëherë kapaciteti i instaluar do të shkonte në 9 MW, gati duke dyfishuar kapacitetin aktual. Momentalisht, HEC Lanabregas ka një prodhim vjetor prej 34.4 GWh.

Për këto dy projekte, HEC-i ka hapur procedurat për shërbimin e konsulencës në studimin dhe hartimin e projektzbatimit dhe preventivit të punimeve.

Angelo Haruni/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.