Interpelanca për bujqësinë. Braçe: Produktet shiten nën kosto. Peleshi: Politikat për 2018, 25 mln euro mbështetje për bujqësinë

Kuvendi ka nisur seancën plenare me interpelancë për bujqësinë, kërkuar nga deputeti i PS Erjon Braçe për ministrin e Bujqësisë Niko Peleshi.

Në fjalën e tij Brace tha se edhe pse bujqësia është sektori më i rëndësishëm në vend ku siguron 22-22 për qind të prodhimit të brendshëm bruto, fermerët i shesin produktet nën kosto.

“Bujqësia sektori më i rëndësishëm në vend, siguron 20-22 për qind të prodhimit në vend, ku shumica dërrmuese e të punësuarve janë në fshatra. Si rregull në treg malli e bën çmimin pastaj vepron tek kërkesa dhe oferta. Por tek ne ku nuk ka tregje, është çmimi ai që po bën mallin. Nëse bujku nuk fiton një sezon, apo në sezonin e dytë për shkak të çmimeve ai nuk e prodhon më atë produkt.  Ata që nuk fitojnë janë bujqit, ka një arsye i detyrojnë të shesin nën kosto. Këto çmime bëjnë që në këtë vend pot ë punosh nuk fiton, edhe po të investosh parat e tua sërish humb.  Investitorët më të mëdhenj në bujqësi janë emigrantët, çmimet po i hanë edhe këto para. Njerëzit po harxhojnë kursimet e tyre, po fitojnë vetëm tregtarët dhe jo bujqit”.

Ministri Peleshi duke pohuar gjithçka që tha deputeti Brace, renditi të gjitha politikat që do të ndërmarr qeveria për vitin e ardhshëm, siç janë përkufizimi i fermerit; mbështetja e fermerit me financime, infrastrukturë, orientim; konkurrueshmëria e ndershme; certifikimi i produkteve; decentralizimi i sistemit ujitës etj.

“Çfarë jemi duke bërë?

1.Jemi duke punuar për përkufizimin e fermerit, fermës, fermer -fermer, fermer -kopshtar në bazë të të ardhurave që siguron dhe na i siguron.

2.Mbështetja e fermerëve. Ne do të fillojmë të rindërtojmë politikat e mbështetjes së fshatit. Mbështetja e produkteve gjeografike. Përmirësimi i infrastrukturës, shërbimeve në fshat. Kemi disa politika për zonat me potencial. Politika e deritanishme me gjithë përmirësimin e 4 viteve të fundit nuk ka shpëtuar nga thërrmimi i fondeve pa një politikë të zgjuar.

3.Viti 2018 do të jetë viti kur kjo qasje do të ndryshojë në kuptimin e raportit mes nevojave për financim dhe burimeve të financimit. 1.7 % më shumë do të jetë mbështetja e qeverisë, pra 25 milion euro. Në 2018 kam frikë se do të përballemi me një realitet tjetër, ku mundësitë do të jenë më të mëdha sesa nevojat për shkak të programit të BE në bashkëpunim me qeverinë shqiptare. Ky program është  93 milion euro, çështja është a kemi ne fuqi, kapacitete që fermeri ti përthithë ato.

4.Sfida jonë është konkurrueshmëria, kostoja nuk është përcaktues. Domatet tona 70 për qind më lirë se në Evropë, bostani 50 %, gështenja 40 %. 76 % e prodhimeve tregtohen në vendet jo evropiane, se na mungojnë certifikatat e produkteve. 10 kompanitë e para janë duke u pajisur me certifikatat për të tregtuar në Evropë. Shpesh herë grumbulluesit nuk mbledhin dot sasinë e madhe për tu lidhur me blerës të mëdhenj. Frigorifimi është në hapat e para në vend, fermat janë të vogla. Me bankën Botërore jemi duke përmbyllur marrëveshjen për 25 milion euro për ujitjen e kullimin.

5.Sa i takon cilësisë, i takon shtetit të vendos një kontroll më të mirë, mos lejimin e monopolit të këtij tregu, produkteve e farave të falsifikuara. Drejtoritë e bujqësisë do të shkrihen, do të rikonceptohen detyrat të agronomëve. Do të bashkëpunojmë me Universitetin e Bujqësisë për kontrollin e agronomëve. Shpeshherë fermerët dështojnë se nuk dinë të përdorin pesticidet, kulturat që duhen mbjellë, dhe çfarë kërkon tregu”.

E.Z/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.