Investime në blloqet e banimit – Veliaj: Sfida e Bashkisë, infrastrukturë e urbanizim në ish-komuna

Bashkia e Tiranës ka nisur punimet për shtrimin e Rr. “Alla” dhe hapjen e segmentit të ri që e lidh atë me Rr. “Shyqyri Brari”. Kryetari i Bashkisë së Tiranës, Erion Veliaj, inspektoi punimet dhe siguroi banorët se pasi të kthehen nga pushimet do të gjejnë një infrastrukturë të re. Veliaj deklaroi se ky është hapi i parë i projektit të Bashkisë për Kopshtin Zoologjik dhe Botanik

“Fillimisht do të bëjmë konturimin e rrugëve përreth, përpara se të fillojmë më vonë, brenda vitit, me investimin në Kopshtin Zoologjik dhe Kopshtin Botanik. Duke sistemuar këtë lagje dhe duke vënë konturet, ku nuk do të lejohet më zhvillim mes Kopshtit Zoologjik e atij Botanik, do të jemi gati të ndërhyjmë me propozimet e arkitektëve gjermanë për të pasur një Kopësht Zoologjik jashtëzakonisht modern në qytetin e Tiranës”, u shpreh Veliaj.

Kreu i bashkisë u kërkoi qytetarëve që të tregohen të kujdesshëm kur investojnë në blerjen e banesave të tyre, të interesohen për dokumentacionin e plotë dhe për planin e zhvillimit të zonës në të cilën do të investojnë.

“Dua po ashtu t’u bëj një thirrje të gjithë qytetarëve, për të kuptuar se është normale që të kërkojnë ndihmën e shtetit në situatë krize, në situatë zjarri, në situatë të thatësirës, por a nuk do ishte më mirë ta kërkonim ndihmën e shtetit që në fillim, kur marrim vendime për të banuar diku? Ajo që do të ishte e udhës është që përpara se qytetarët të blejnë një banesë, të pyesin a ka ujë me rrjet apo ka ujë me pus, ka leje ndërtimi, leje shfrytëzimi dhe letrat në dorë të Hipotekës apo thjesht po i vëmë paratë e kursimet tona në një gropë të zezë, e cila momentalisht mund të na japë një strehim, ama në afatgjatë sjell të gjithë këto problematika”, shtoi Veliaj.

Punimet në këtë zonë parashikojnë disiplinimin e ujërave, rrjetin inxhinierik, asfaltimin, si dhe pajisjen me të gjithë sinjalistikën e nevojshme për të rritur sigurinë e banorëve. Ky projekt synon, përveç përmirësimit të kushteve të jetesës së banorëve, edhe zhvillimin ekonomik të zonës.

Nertila Doko/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.