Ish ministri i Transporteve në “Argument”, Haxhinasto: “AirAlbania”, cilat janë 2 mundësitë për një kompani të tillë në Shqipëri!
Ish ministri i Transporteve, deputeti i LSI-së Edmond Haxhinasto ka komentuar në emisionin “Argument” në televizionin SCAN foton e publikuar një ditë më parë nga kryeministri Edi Rama ku shfaqej një avion me logon “Air Albania”. Sipas Haxhinastos, është detyrim që çdo kompani që operon nga Shqipëria të ketë flamurin shqiptar.
Në përgjigje të pyetjes së gazetarit Enio Civici, Haxhinasto tha se në këtë rast mund të kemi të bëjmë me një kompani private që operon me logon “AirAlbania” dhe me flamurin shqiptar dhe jo me një kompani publike fluturimesh.
“Mund të realizohet në dy koncepte. Kompani private që nuk merr asnjë cent nga shteti dhe kërkon që logo të ketë flamurin shqiptar dhe nuk ka angazhim shteti në këtë rast.Situata tjetër kur kjo është ajo e një kompanie publike që është pronë e shtetit shqiptar. Nuk e besoj se në këtë rast kemi të bëjmë me këtë të dytën” tha Haxhinasto. Sipas tij, mund të jetë kompani private që ka bërë kërkesë të jetë “AirAlbania” dhe të ketë si logo flamurin shqiptar. Ka pasur gjithmonë kërkesë të tilla. Para tre vitesh kemi miratuar një konsorcium që kishte investitorë nga Kosova e Gjermania dhe nuk është gjë që nuk realizohet. Por nëse kompani që krijohet e do të ishte pronë e shtetit shqiptar, atëhere do të ishte gjë tjetër. Nuk e mendoj se shteti shqiptar ka buxhet për krijimin e një kompanie të tillë” tha Haxhinasto ndërsa e konsideroi si një zhvillim shumë pozitiv këtë ide.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.