KE vlerëson sektorin bankar – I mirëkapitalizuar, ka hapësira për të rritur kreditimin

Stabiliteti i sektorit bankar në Shqipëri është përmirësuar ndejshëm. Bankat shqiptare në përgjithësi janë të mirëkapitalizuara, ndërkohë që likuiditeti vlerësohet gjithashtu bindshëm mbi nivelet minimale, thotë Komisioni Europian në progres-raportin për vendin tonë.

Depozitat, thuhet më tej, mbeten burimi kryesor i financimit ndërkohë që mbulojnë thuajse 2 herë totalin e huave të bankave. Edhe niveli i kredive me probleme ka rënë ndjeshëm gjatë 2017-ës, vlerëson Brukseli.

Normat e fitimit të sektorit janë përmirësuar gjithashtu gjatë 2017-ës, ndërkohë që rezultat financiare flasin për dyfishim të fitimeve në terma vjetorë.  Por, Komisioni Europian nuk ngurron të vërë theksin te përdorimi ende i lartë i monedhës europiane në marrjen e huave.

Kjo gjë e bën pagesën e kësteve të ndjeshme ndaj zhvlerësimit të monedhës vendase, thotë Brukseli, që e rendit përdorimin e monedhës vendase si një ndër rekomandimet afat-gjatë për ekonominë shqiptare.

Ndër të tjera, Komisioni Europian thekson faktin se, bankat kanë hapësira dhe mundësi për të rritur kreditimin duke mbështetur rimëkëmbjen ekonomike për rrjedhojë.

Huatë ndaj biznesit dhe familjeve vlerësohen në vetëm 37% të PBB së vendit, çka përkthehet në një hapësirë edhe më të madhe për kreditimin.

Sa i përket sektorit financiar në tërësi, që në pjesën dërrmuese përfaqësohet nga bankat, e sidomos sa i përket rregullatorëve, Brukseli flet për një përgatitje të mirë të Shqipërisë, ç`ka e bën këtë një ndër detyrat më të lehta për të përmbushur në rast anëtarësimi në union.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.