Komisioni i Prokurimeve Publike kalon në varësi të Kuvendit! Pritet hapja e garës për përzgjedhjen e kryetarit dhe anëtarëve të rinj

Komisioni i Prokurimit Publike tashmë nuk do të ketë varësi nga qeveria por nga Kuvendit. Ky është një prej ndryshimeve kryesore të amendamenteve që janë depozituar në Kuvend. Nisma e Këshillit të Ministrave reflekton rekomandimin e Komisionit Europian që ka evidentuar në progresraportin e fundit se “varësia aktuale e këtij institucioni nga Kryeministri mund të ndikojë në pavarësinë dhe paanshmërinë e tij në vendimmarrje”.

“Në këtë kontekst, synimi kryesor i ndryshimeve dhe shtesave të paraqitura përmes këtij projektligji është rritja e pavarësisë së institucionit të Komisionit të Prokurimit Publik, duke parashikuar  përzgjedhjen e anëtarëve të tij nga Kuvendi dhe jo më, nga Kryeministri” shkruhet në relacionin e nismës së miratuar nga Këshilli i Minsitrave.

Referuar ndryshimeve që propozohen, do të jetë Kuvendi ai i cili do të miratojë anëtarët e Komisionit të Prokurimit Publik. Propozimi i dërgohet Kuvendit nga Këshilli i Ministrave, i cili do të zhvillojë paraprakisht një procedurë seleksionuese të kandidatëve, nëpërmjet një njoftimi publik. Siç parashikohet në propozim, Këshilli i Ministrave pas përfundimit të procedurës përzgjedhëse do t’i dërgojë Kuvendit jo vetëm listën e kandidatëve të cilët kanë përmbushur kriteret për emërim, të renditur sipas pikëve që kanë marrë, por edhe listën e kandidatëve që nuk janë kualifikuar, duke garantuar në këtë mënyrë transparencën e procesit.

Gjithashtu, parashikohet që Kuvendi ka të drejtë të ndjekë procedurën e vet përzgjedhëse duke i lënë mundësinë që, nëse e vlerëson se i nevojitet më tepër informacion, të zhvillojë intervista me kandidatët pa marrë parasysh renditjen e dërguar nga Këshilli i Ministrave.

Në projektligj janë parashikuar edhe dispozitat kalimtare, për të shmangur problemet që mund të lindin deri në ngritjen dhe konstituimin e institucionit të Komisionit të Prokurimit Publik, sipas parashikimeve të këtij projektligji. Pikërisht është parashikuar që, kryetari dhe anëtarët ekzistues të KPP-së do të qëndrojnë në detyrë deri në datë 1 janar 2018, por ndërkohë që i lihet detyrë Këshillit të Ministrave që të shpallë njoftimin për aplikim për përzgjedhjen e Kryetarit dhe anëtarëve të rinj brenda datës 1 korrik 2017, raporton SCAN. Gjithashtu, për të siguruar një rotacion të mandateve është parashikuar që në mandatin e parë, kryetari dhe nënkryetari do të ushtrojnë detyrat e tyre për një periudhë 5-vjeçare dhe anëtaret për një periudhë 3-vjeçare.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.