Kredia anti-Covid në Kuvend/ Shqipëria merr 15 milionë euro nga Banka Ndërkombëtare për Rindërtim dhe Zhvillim
Këshilli i Ministrave ka depozituar në Kuvend për ratifikim marrëveshjen e huasë me Bankën Ndërkombëtare për Rindërtim dhe Zhvillim, për projektin për reagimin ndaj emergjencës COVID-19 në Shqipëri, në shumën prej 15 000 000 (pesëmbëdhjetë milionë) eurosh.
“Objektivat që synohen të arrihen nëpërmjet këtij projekligji janë parandalimi, zbulimi dhe reagimi ndaj rrezikut që paraqet COVID-19, si dhe fuqizimi i sistemeve kombëtare të gatishmërisë së shëndetit publik në Republikën e Shqipërisë” shkruhet në relacion.
Mbështetja e sektorit shëndetësor për të reaguar ndaj COVID-19 menjëherë dhe në një periudhë afatmesme konsiston në:
– fuqizimin e funksioneve kryesore të shëndetit publik për frenimin, parandalimin e përhapjes së COVID-19;
– fuqizimin e sistemit shëndetësor për rritjen e kapaciteteve për trajtimin e rasteve të COVID-19 dhe sëmundjeve, që lidhen me të;
– mbështetjen për masat e distancimit fizik dhe komunikimin në distancë.
Fuqizimi i funksioneve kryesore të shëndetit publik për parandalimin e përhapjes së COVID-19, do të realizohet ndër të tjera, përmes:
a) fuqizimit të rrjetit të survejancës epidemiologjike, ndër të tjera, të sëmundjeve që paraqesin ngjashmëri me gripin, duke përfshirë sistemet e njoftimit të hershëm lidhur me rishfaqjen e përhapjes së vazhdueshme në komunitet;
b) fuqizimit të laboratorëve kombëtarë të referencës dhe shëndetit publik, si dhe të kapaciteteve epidemiologjike për zbulimin dhe konfirmimin në një fazë të hershme të rasteve të COVID-19 dhe sëmundjeve të tjera që lidhen me të
c) mbështetjes së zbulimit të rasteve të reja dhe gjurmimit të kontakteve aktive, duke përfshirë, ndër të tjera, sipas rastit, rekrutimin e personelit të ri dhe blerjen e pajisjeve (automjete për transportimin e të sëmurëve, kompjutera dhe tabletë) dhe të një programi kompjuterik të bazuar në aplikacione ose faqe interneti për dokumentimin dhe komunikimin;
ç) mbështetjes për trajnimin dhe edukimin e shërbimit epidemiologjik dhe hetimin epidemiologjik;\
d) fuqizimit të vlerësimit të riskut epidemiologjik dhe të vendimmarrjes;
dh) sigurimit në kohë të të dhënave dhe informacioneve për orientimin e vendimmarrjes dhe të veprimtarive reaguese dhe zbutëse; dhe
e) fuqizimit të HMIS-së për mundësimin e regjistrimit dhe të shpërndarjesvirtuale në kohë të informacionit.
Fuqizimi i sistemit shëndetësor për rritjen e kapaciteteve për trajtimin e rasteve të COVID-19 dhe sëmundjeve që lidhen me të, ndër të tjera, do të realizohet përmes:
a) kryerjes së punëve të vogla civile (brenda gjurmës fizike ekzistuese) në SHSIQSUNT për përmirësimin e kapaciteteve dhe të infrastrukturës;
b) rehabilitimit të SHSIQSUNT-së, ndër të tjera, për rritjen e numrit të shtretërve në reanimacion dhe instalimin e pajisjeve shëndetësore të nevojshme;
c) sigurimit të pajisjeve dhe të materialeve të tjera të rëndësishme shëndetësore, duke përfshirë kitet diagnostikuese për koronavirusin;
ç) sigurimit në shkallë të gjerë të pajisjeve mbrojtëse personale për punonjësit e kujdesit shëndetësor;
d) sigurimit të trajnimit dhe të udhëzuesve të përshtatur për punonjësit e kujdesit shëndetësor për identifikimin dhe trajtimin e COVID-19, për përdorimin siç duhet të pajisjeve mbrojtëse personale, si dhe për mbikëqyrjen e sëmundjes dhe parandalimin e përhapjes së infeksioneve respiratore brenda strukturave të kujdesit shëndetësor;
dh) blerjes së ambulancave moderne ose automjeteve për transportimin e të sëmurëve, me qëllim dërgimin e personave të infektuar në vendet e posaçme për trajtim; dhe
e) mobilizimit të profesionistëve të kualifikuar në fushën e shëndetit, të cilët aktualisht nuk punojnë në sistemin publik të kujdesit shëndetësor, dhe të studentëve të vitit të fundit të mjekësisë, me qëllim ofrimin e shërbimeve klinike për t’iu përgjigjur pandemisë.
Mbështetja për masat e distancimit fizik dhe komunikimin në distancë, ndër të tjera, do të realizohet përmes:
a) sigurimit të distancimit të sigurt fizik, duke përfshirë në rastin kur është e zbatueshme për përgjegjësitë e huamarrësit dhe ofrimin e kujdesit shëndetësor e shoqëror;
b) zhvillimit të aftësive të fuqisë punëtore dhe kapaciteteve teknologjike, me qëllim mundësimin më lehtësisht të konsultave mjekësore në distance nëpërmjet teknologjisë së telekomunikacionit (telemjekësisë) dhe që shërbimet, të cilat nuk mund të zëvendësohen nga platformat virtuale, të mund të ofrohen praktikisht në kushtet e masave të marra për distancimin fizik;
c) krijimit dhe shpërndarjes së materialeve në media të llojeve të ndryshme (duke përfshirë median e bazuar në faqet e internetit, median e shkruar dhe videot) që japin shpjegime lidhur me procesin dhe arsyetimin për rihapjen; dhe
ç) hartimit të udhëzuesve për masat lidhur me distancimin fizik, të përshtatur sipas sektorëve ose grupeve specifike dhe të përshtatura, sipas nevojës, për fazat e rihapjes nga epidemia përmes medias së shkruar dhe jo të shkruar dhe në gjuhët që përdoren në komunitet, duke përfshirë, ndër të tjera udhëzuesit për:
- lloje të ndryshme biznesi;
- udhëtarë; dhe
iii. shërbime të kujdesit shoqëror në bazë komuniteti, rezidenciale dhe të specializuara, të tilla si ato që lidhen me fëmijët, dhunën për shkak të gjinisë dhe trafikimin e komuniteteve rome dhe egjiptiane.
Huaja e akorduar nëpërmjet kësaj marrëveshjeje ka termat financiare të mëposhtme:
Shuma: 15 000 000 euro;
Interesi: bazuar në normën e referencës Euribor + marzh të pandryshueshëm (0.65%);
Tarifa Front-end: 0.25% e shumës së huasë;
Komision angazhimi: 0.25% që përllogaritet mbi vlerën e padisbursuar të huas;
Maturimi: 12 vjet duke përfshirë periudhën prej 3.5 vitesh pa pagesë principali
Huaja nuk shoqërohet me kosto lokale, pasi të gjithë zërat do të mbulohen nga projekti për reagimin ndaj emergjencës COVID-19 në Shqipëri.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.