Kreditë e këqija ulen me 18% – Individët, shumë më mirë se bizneset
Vlera e kredive me probleme të sistemit bankar shqiptar zbriti në 63 miliardë lekë në mesin e këtij viti. Sipas të dhënave nga Bankës e Shqipërisë, kjo shifër paraqitet në rënie me 18% krahasuar me të njëjtën periudhë të vitit të kaluar. Në këtë rënie, kontributin kryesor e kanë dhënë shlyerjet, dalja e disa kredive nga kategoritë problematike, si edhe fshirja e një pjese të kredive të humbura. Në 12 muajt e fundit, sistemi bankar ka fshirë rreth 6.4 miliardë lekë kredi të humbura, të përfaqësuara kryesisht nga kreditë e bizneseve në lekë.
Gjithsej, që nga fillimi i procesit të fshirjes, në vitin 2015, bankat kanë nxjerrë jashtë bilanceve 57.4 miliardë lekë kredi të humbura. Por, ritmi i fshirjeve të kredive të humbura nga bilancet e bankave natyrshëm ka rënë gjatë vitit të fundit. Këshilli Mbikëqyrës i Bankës së Shqipërisë së fundmi ka ndryshuar rregulloren e vitit 2015, që parashikonte fshirjen e kredive që klasifikoheshin si të humbura prej të paktën tre vjetësh, duke e ulur këtë afat në dy vjet. Ulja me një vit e këtij afati bëhet me qëllim një pastrim të mëtejshëm të portofolit të bankave nga kreditë e humbura.
Në mesin e këtij viti, raporti i kredive me probleme ishte 11.2%, rreth dy pikë përqindje më pak krahasuar me mesin e vitit të kaluar. Sipas segmenteve, cilësia e kredisë paraqitet më e dobët për kredinë për bizneset, kredinë në valutë dhe kredinë me afat të mesëm maturimi. Bizneset vazhdojnë të kenë një portofol më pak cilësor dhe raporti i kredive me probleme në mesin e këtij viti arriti në pothuajse 15%, ndërsa për individët ky raport ishte pranë nivelit të 6%. Veçanërisht, kredia për blerjen e pasurive të paluajtshme shënon raport mjaft të ulët që kredive me probleme dhe ka zbritur në 5.3%, nga 6.8% që kishte qenë në mesin e vitit të kaluar.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.