Kursi i këmbimit – Mbiçmimi vjetor i lekut zbriti në 1% në fund të 2019
Mbiçmimi i lekut ndaj euros në kursin e këmbimit valutor u frenua ndjeshëm gjatë vitit të kaluar. Statistikat e Bankës së Shqipërisë tregojnë se për muajin dhjetor 2019, euro u këmbye mesatarisht me 122.2 lekë. Krahasuar me një vit më parë, leku ka fituar rreth 1% në vlerat e këmbimit kundrejt euros. Ky mbiçmim është shumë më i ulët krahasuar me vitin paraardhës. Në dhjetor të vitit 2018, mbiçmimi vjetor i lekut kundrejt euros kishte qenë disa herë më i lartë, me rreth 7.5%.
Kursi i këmbimit gjatë vitit 2019 përgjithësisht rezultoi i qetë dhe pa luhatje të mëdha, në përputhje me projeksionet e Bankës së Shqipërisë. Ndërhyrja e Bankës Qendrore, në verën e vitit 2018, arriti të frenojë tendencën e mbiçmimit të shpejtë të lekut, të shkaktuar nga disa çrregullime të përkohshme në tregun valutor.
Stabilizimi i kursit u vlerësua i domosdoshëm për të siguruar përmbushjen e objektivit të inflacionit. Mbiçmimi i euros solli ulje drastike të presioneve inflacioniste nga jashtë, duke u përcjellë në vlera të ulëta të inflacionit, sidomos gjatë vitit 2019.
Në harkun e pesë viteve të fundit, leku ka fituar ndjeshëm terren ndaj euros. Në raport me fundin e vitit 2014, monedha shqiptare është mbiçmuar me afërsisht 13%. Sipas Bankës së Shqipërisë, forcimi i lekut në këtë hark kohor reflekton përmirësimet në bilancin e pagesave, të mbështetura sidomos nga flukset e larta hyrëse të investimeve të huaja direkte dhe rritjen e ndjeshme të të ardhurave nga turizmi.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.