Largimet e padrejta nga puna – KMSHC: 311 gjyqfitues në 2018, institucionet nuk zbatojnë vendimet e gjykatave

311 nëpunës të administratës civile kanë fituar gjyqet dhe kërkojnë rikthimin në punë, por pjesa më e madhe e institucioneve nuk i zbaton vendimet e formave të prera të gjykatave. Në raportin vjetor për vitin 2018, Komisioneri për Mbikëqyrjen e Shërbimit Civil konstaton se nëpunësit mbeten ende në pritje, megjithëse kanë në dorë një vendim gjykatë që detyron institucionet t’i rikthejnë në pozicionin e punës nga i cili janë larguar.  Në total, numri i vendimeve gjyqësore për të larguarit nga puna për vitin e shkuar është 477, ndërkohë që 166 prej tyre kanë marrë përgjigje, me dëmshpërblim apo rikthim në punë.

Më hollësisht, Në institucionet e administratës shtetërore qendrore dhe ato të varësisë 32% (ose 100 raste) e nëpunësve gjyqfitues, janë rikthyer në pozicione të rregullta të shërbimit civil, ndërsa 68% (209 raste) e tyre janë ende në pritje për t’u rikthyer në pozicione pune në shërbimin civil.

Ndërkohë, në institucionet e vetëqeverisjes vendore, në kategorinë e bashkive, në 61 institucione dhe 12 Këshillat e qarqeve janë rikthyer në pozicione të rregullta të shërbimit civil, ose janë dëmshpërblyer 41% (62 raste) e nëpunësve gjyqfitues, ndërsa 59% (90 raste) e tyre janë ende në pritje për ekzekutimin e vendimit.

Lorenc Rabeta/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.