“Lehtësohet kredimarrja për bizneset” – Vrojtimi i BSH: Indeksi i vështirësisë u përmirësua në gjysmën e dytë të 2020-ës
Indeksi i vështirësisë së procesit të huamarrjes nga bankat, nga ana e ndërmarrjeve ka rezultuar 0.38, në 6-mujorin e dytë të vitit 2020, duke shënuar rënie në krahasim me periudhën paraardhëse. Kjo në bazë të Vrojtimit mbi Gjendjen Financiare dhe Huamarrjen, realizuar nga Banka e Shqipërisë, ku u përfshinë 1,374 ndërmarrje të madhësive të ndryshme, të shtrira gjeografikisht në të gjithë vendin dhe që kryejnë aktivitetin e tyre në sektorët kryesorë të ekonomisë. Sipas dokumentit, ky indeks vijon të mbetet midis nivelit “normal” dhe “i vështirë”, për të tre grupet e ndërmarrjeve, ndërkohë që krahasuar me gjashtëmujorin e parë 2020, niveli i vështirësisë ka pësuar rënie për ndërmarrjet e vogla dhe për ato të mëdha.
Paralelisht me lehtësimin e procesit në marrjen e një kredie, indeksi i marrëdhënies me bankat, sipas bizneseve që morën pjesë në vrojtim, vijon të vlerësohet midis nivelit “e rëndësishme” dhe “e domosdoshme”. Ndërkohë që, sipas Bankës së Shqipërisë, rritja e këtij indeksi për të gjitha madhësitë e ndërmarrjeve, vlerëson rritjen e rëndësisë së marrëdhënies me bankat gjatë periudhës. Ndërkaq, kostoja e kredisë vijon të konsiderohet si elementi kryesor që vështirëson përfitimin e një huaje bankare, në mënyrë më të theksuar për ndërmarrjet e vogla dhe ato të mesme.
Megjithatë, vlerësimi për këtë element ka rezultuar në rënie për këtë gjashtëmujor për ndërmarrjet e vogla dhe ato të mëdha. Në vijim të kostos së kredisë, edhe kostoja e plotësimit të kërkesave të bankës vijon të mbetet një vështirësi e konsiderueshme për të tre grupet e ndërmarrjeve, ndjekur nga vlerësimi i kushteve për garantimin e kredisë dhe paqartësia e kërkesave të bankës apo procedurat burokratike. Gjithsesi, këto elemente kanë shënuar një rënie të lehtë për ndërmarrjet e vogla për periudhën e vrojtuar.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.