Ligji për arsimin e lartë – Nikolla: Janë miratuar 27 akte nënligjore, në proces 11 të tjera
Nga 38 akte nënligjore të ligjit për arsimin e lartë ende janë pa u miratuar 6 vendime të këshillit të ministrave dhe 5 udhëzime, të cilat sipas ministres së Arsimit Lindita Nikolla nuk pengojnë funksionimin e institucioneve të arsimit të lartë. Nikolla gjatë raportimit në komisionin për edukimin dhe mjetet e informimit Publik, deklaroi se po vijon puna intensive për përfundimin e të gjitha akteve nënligjore
“Janë 38 akte nënligjore që përbëjnë korpusin e akteve nënligjore të ligjit të ri për arsimin e lartë. Nga këto 38 akte nënligjore, 27 janë vendime të Këshillit të Ministrave dhe 11 janë udhëzime të ministrit apo udhëzime të përbashkëta me përfaqësues të ministrive të tjera. Deri në momentin që ne kemi raportuar te ju, pra raportimi i parë i bërë te ju për aktet nënligjore të miratuara, kemi raportuar 19 vendime të Këshillit të Ministrave dhe 6 udhëzime të ministrit që janë miratuar dhe që kanë mbetur të pa miratuara 6 vendime të Këshillit të Ministrave dhe 5 udhëzime të ministrit. Ndërkohë, ju bëj me dije që janë miratuar në masën 100% urdhra të ministrit, rregullore të ministrit apo urdhra të kryeministrit.”
Lidhur me buxhetin e ulët për arsimin e lartë ku për 2018 kapi shifrën prej 3.3% te prodhimit të brendshëm bruto nga 5% që ishte parashikuar. Nikolla u Përgjigj se kjo mbetet objektiv për vitin e ardhshëm.
Në komision nuk munguan debatet lidhur me vonesat te akteve nënligjore të cilat sipas ligjit duhet të ishin miratuar brenda 9 muajve nga hyrja në fuqi e ligjit. Këtë vonesë kryetarja e komisionit Albana Vokshi e ka vlerësuar shkelje ligjore nga ana e Ministrisë së Arsimit.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.