Manastirliu: Vendi duke u përgatitur për fazën e dytë / Rihapet transporti publik
Ministrja e Shëndetësisë, Ogerta Manastirliu ka mbajtur një komunikim publik ku ka folur për planin e masave për të përballuar fluksin e të shtuarve të prekur nga COVID19.
Duke parë rritjen e rasteve gjatë ditëve të fundit Manastirliu është shprehur se janë duke u përgatitur disa skenarë për trajtimin e të prekurve nga ky virus dhe nga ana tjetër po vijojnë pa ndërprerje shërbimet mjekësorë pasi sistemi shëndetësor është rihapur me kapacitet të plotë.
Ministrja u ka bërë thirrje qytetarëve që të marrin gjithë masat e nevojshme për të bërë të pamundurën për të shmangur çdo mbingarkesë të shkaktuar nga ky infeksion.
Manastirliu tha se vendi është duke u përgatitur për fazën e dytë, duke hapur spitalin e ish-kirurgjisë në QSUT, për të përballuar flukset në rritje dhe jemi gati duke rekrutuar stafin mjekësor dhe infiermeror që do të shërbejnë në këtë spital.
“Nëse do të kemi shtim të rasteve në terapi intesive do të rihapim spitalin Shefqet Ndroqi dhe në skenarin tjetër në rast se shifrat do të kapërcejnë këto kapacitete do të hapet spitali Covid 4 në aksit Tiranë – Durrës”, tha Manastirliu.
Ministrja gjithashtu ka njoftuar se është vendosur heqja e kufizimeve në transportin publik, do të vijoj transporti publik ndërqytetas dhe brenda qyteteve por me disa masa dhe protokolle sigurie të cilat janë të miratuara nga Ministria e Shëndetësisë, ku përdorimi i maskës gjatë transportit publik si për ata që shërbejnë edhe për qytetarët do të jetë i detyrueshëm.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.