Mbrojtja e sipërmarrjes – Qato: Biznesi më shumë aktiv në vendimmarrje
Kërkesë e kahershme e komunitetit të biznesit është diskutimi i ndërmarrjes së politikave ekonomike dhe fiskale. Ministre e Shtetit për Mbrojtjen e Sipërmarrjes, Sonila Qato, në një intervistë për SCAN, u shpreh se me kalimin e Këshillit Ekonomik Kombëtar në varësi të këtij institucioni, biznesi do të ketë më shumë mundësi për të dhënë opsionet e tij dhe të jetë pjesë në vendimmarrje të rëndësishme për ekonominë e vendit.
Gjithashtu do të jenë pjesë e diskutimeve për ligjet fiskale të cilat kanë të bëjnë drejtpërdrejt më aktivitetin e tyre.
“Viti 2018 do të jetë viti, i propozimeve konkrete, do të jetë viti i debateve. Do të jetë edhe një vit që do ta bëjë sipërmarrjen të ndihet një partnere në bashkëqeverisjen e vendit gjatë këtij mandati. Këshilli Ekonomik Kombëtar duhet të jetë portali i konsultimit publik për sa i përket biznesit të politikave fiskale që qeveria duhet të ndërtojë. Nuk është e thjeshtë të ndryshosh mentalitetin e një mënyre rutinë edhe të veprimtarisë së mekanizmave të administratës shtetërore. Por është mision nga ana tjetër, fakti që ne duam të bëjmë në konsultim publik me çfarë do lloj nisme që do të kemi në raport me qytetarët edhe me biznesin”, u shpreh Qato.
Tashmë pranë këtij dikasteri është ngritur një “dritare” për gjithë ankesat dhe sugjerimet e sipërmarrjes. Ndërkohë ministrja premtoi që brenda 2018 do të miratohet ligji i ri për funksionimin e Dhomave të Tregtisë, si një instrument që do të ndikojë në konsolidimin e strukturimit të sipërmarrjes.
Violeta Shqalsi/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.