Më shumë vizitorë në parqet kombëtare – Divjakë – Karavasta, mbi 30 mijë turistë deri në korrik

Mbi 30 mijë turistë  kanë vizituar deri në  muajin korrik një ndër parqet kombëtare më të bukura të vendit, atë  të Divjakë –Karavasta, ose 50% më shumë se në 2016. Specialisti për menaxhimin  pranë  këtij parku, Enea Zenuni shprehet për televizionin SCAN se kjo është bërë e mundur falë investimeve  të kryera si ngritja e qendrës së vizitorëve falë projektit “Natyra 2000” ku ata mund të marrin shërbime të ndryshme kundrejt një pagese modeste.

Sipas Zenunit, aty vizitorët kanë mundësi të shëtisin me varka  apo biçikleta kundrejt një pagesë prej 200 lekësh, ndërkohë që  nuk ka asnjë pagesë fikse  për hyrjen në park. Lidhur me të ardhurat  sipas specialistit ato përdoren për investime siç është dhe ai  më i fundit  ngritja  e një kulle 12 katëshe për vrojtimin e  parkut kombëtar.

Vetëm për korrikun  parkun e kanë vizituar rreth 12 mijë turistë të huaj  kryesisht nga  Franca, Gjermania, Belgjika, Shtetet e Bashkuara , Polonia dhe Çekia. Parku kombëtar  Divjakë – Karavasta më një sipërfaqe  mbi 22 mijë  ha  është përzgjedhur si një ndër 5 zonat  e mbrojtura primare  në vendin tone.

Nertila Doko/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.