Moti i vështirë me reshje bore, OSSH përgatit grupin në terren për normalizimin e situatës

Prej disa ditësh vendi është përfshirë nga një mot i keq, shoqëruar me reshje të dendura shiu dhe dëbore, kryesisht në zonat e malësisë.

Nisur nga parashikimi i motit, OSSH ka organizuar dhe ngritur grupet e gatishmërisë në të gjithë vendin, duke përforcuar personelin dhe bazë materiale të nevojshme. Problematikat më të vështira hasen në linjat ajrore dhe për shkak të terrenit të vështirë është e vështirë përcjellja e bazës materiale.

Njoftimi i OST:

Pavarësisht masave, koha e keqe pengon stafet tona të reagojnë më shpejtë për normalizimin e situatës. Problematika shfaqen kryesisht në zona të thella rurale, ku gjatësia e rrjetit arrin deri 60 km, sidomos në veri të vendit.

Dëbora është bërë pengesë për kalimin e bazës materiale, pasi rrjeti elektrik kalon në terrene të vështira, si në Valbonë, Lekbibaj, Lëpushë, Kelmend, etj.

Sikurse ju kemi përcjellë përmes fotove situatën e vështirë, dëmet janë kryesisht te përcjellësit, izolatorët dhe shtyllat, pra në rrjetin ajror që kalon përmes relieve malore.

Petraq Lika, administrator i OSSH Sh.A, thotë për mediat se, “Nga brigadat e terrenit po punohet me intesitet të lartë për riparimin e defekteve të mbetura. Vështirësi në riparimin e defekteve paraqitet në zonat rurale, ku kryesisht janë linja ajrore, gjë që sjell dhe vonesa në zgjidhjen e problemit për shkak të terrenit të vështirë”.

Afro 90% e defekteve janë në zona rurale, ku 70% janë në zona “rurale të thella”. Aktualisht rajonet më të prekura nga defektet janë Shkodra, Kukësi, Vlora, Burreli dhe Bajram Curri. Foto video më poshtë, në malësi të Kukësit dhe Shkodrës.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.