Ndëshkimi i krimit mjedisor- Xhafaj e Klosi: Ashpërsimi i ligjit, në funksion të turizmit

Krimi mjedisor do të konsiderohet, dënohet dhe penalizohet si çdo krim tjetër. Në prag të fillimit të aksionit të madh të pastrimit të Shqipërisë, Ministrat Blendi Klosi dhe Fatmir Xhafaj zhvilluan takimin me prefektët dhe drejtuesit e policisë në qarqe, për t’ju bërë me dije se do të jenë aktorët kryesorë në terren të zbatimit të ligjit të ndalimit të krimit mjedisor.

“Kush dëmton mjedisin tonë të përbashkët që është malli jonë i përbashkët, pasuria jonë e përbashkët, mundësia jonë e përbashkët për të zhvilluar turizmin, mundësia jonë e përbashkët për të zhvilluar ekonominë, mundësia jonë e përbashkët për të zhvilluar mirëqenien, duhet të dënohet, të penalizohet” – deklaroi Klosi.

Ministri i Brendshëm, Fatmir Xhafaj, tha se turizmi konsiderohet prioritet thelbësor për qeverisjen për këtë mandat të ri e do të ketë mbështetjen e nevojshme.

 “Policia dhe prefektët duhet të përgatiten për mbështetje të fortë të strukturave të Ministrisë së Turizmit, lidhur me fazën përgatitore, që nga pastrimi i mjediseve dhe masave të tjera që duhet të merren”, – shtoi ministri i Brendshëm.

Sipas të dy ministrave, ashpërsimi i ligjit dhe zbatimi i tij i barabartë për krimin mjedisor do të bëjë që jo vetëm të mbrohet mjedisi por edhe vetë shteti të ketë një qasje ndryshe ndaj turizmit.

Entela Barjamaj/SCAN 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.