Ndryshimet në ligjin për Policinë e Shtetit. Komisioni parlamentar për Sigurinë Kombëtare rrëzon dekretin e presidentit

Komisioni parlamentar për Sigurinë Kombëtare ka shqyrtuar  dekretin e Presidentit te Republikës për ligjin  “Për Policinë e Shtetit, të ndryshuar “. Ministri i Brendshëm Sandër Lleshaj hodhi poshtë  pretendimet e Presidentit. Lleshaj tha se ndryshimet në ligj nuk janë rrezik i shtuar për keqpërdorimin e forcave policore për qëllime politike duke shtuar se  policia është në shërbim të qytetarëve dhe jo forcave politike

“Jo kontrolli demokratik mbi administratën, por mungesa e kontrollit konsiderohet i rrezikshëm për lirinë dhe të drejtat e qytetarëve. Qeveritë janë ndër organet kryesore që janë produkti  zgjedhjeve dhe për rrjedhojë kanë legjitimitet demokratik dhe autorizim për të ushtruar kontroll demokratik mbi organet e administratës që nuk zgjidhen dhe nuk japin llogari të drejtpërdrejtë përpara qytetarëve. Demonizimi i qeverisë dhe tendenca për ta larguar atë nga përgjegjësia dhe kontrolli demokratik mbi organet e administratës do të ishte formula që do të rrezikonte shumë që këto të fundit të dilni mbi liritë dhe të drejtat e njeriut.

Lleshaj theksoj se ndryshimet ishin të nevojshme pasi duhej një ligj i veçantë për përgjimin parandalues të veprave penale .

“Që të parandalojë kryerjen e veprave penale, Policisë i duhen instrumente dhe atribute ligjore. Dhe kjo i jepet nëpërmjet këtij ligji, i jepet mundësia që të bëjë mbikëqyrje vizuale ose filmime në mjedise publike kundrejt rregullave, dispozitave të përcaktuara nga Prokurorët.”

Më herët këshilltari i Presidentit të Republikës, Bledar Dervishaj, shprehu kundërshtitë e argumentuara, duke i vlerësuar  ndryshimet si hapësira për abuzim dhe shkelje të parimit të ndarjes dhe balancimit te pushteteve duke rrezikuar ta kthejnë Policinë  e Shtetit në një organ që gjurmon  jashtë procesit penal, në shkelje të drejtave dhe lirive te qytetareve

“Thjesht jemi përpara një proces mbikëqyrës parandalues dhe jo procedurial penal, por tashmë janë ulur garancitë për kontrollin e ve[perimtarisë policore nga prokurori që garantoni të drejtat themelore të njeriut.”

Vetëm pak ditë më parë, Presidenti i Republikës, e ktheu per rishqyrtim këtë ligj   me arsyetimin se cënon dhe ndikon në rolin e Policisë se Shtetit.

Nertila Doko / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.