Njohja e fytyrës nga iPhone X jo dhe aq e sigurt – Hackerat arrijnë të thyejnë sistemin me një maskë 150 dollarëshe

Hulumtuesit nga firma e sigurisë Bkav thonë se kanë përdorur një maskë të printuar 3D e cila kushtoi vetëm 150 dollarëshe për të thyer sistemin e njohjes së fytyrës që shkyç iPhone X.

Apple ka pretenduar gjithnjë se sistemi i njohjes së fytyrës është i sigurisë së lartë dhe i pamanipulueshëm, por këtij ekipi iu deshën vetëm 7 ditë për të shkyçur iPhone nëpërmjet kësaj maske.

Këta hulumtues provuan se Face ID nuk është kaq i sigurt dhe efektiv sikurse Apple theksoi gjatë debutimit të produktit.

Studiuesit thanë se e projektuan maskën e tyre duke përdorur printera 2D dhe 3D dhe pjesa e hundës u bë më dorë nga një artist i cili arriti ta sillte në formën e duhur me produkte silikoni .

Ndërkohë karakteristika të tjera të maskës përdorën imazhe 2D dhe një përpunim të veçantë në faqe dhe fytyrë, e cila rezultoi një përpjekje e suksesshme për të mposhtur inteligjencën artificiale.

“Është mjaft e vështirë të bësh maskën e duhur pa njohuri të caktuara të sigurisë”, shkroi një përfaqësues i Bkav në një email për Ars.

“Ne kemi mundur të mashtrojmë Inteligjencën Artificiale të Apple sepse kemi kuptuar se si funksionon Inteligjenca e tyre artificiale dhe se si mund ta anashkalojmë atë”, tha ai.

V.H/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.