Numrat e emigrantëve në Shqipëri – 52 mijë në 2017, 1387 nga të cilët janë refugjatë
E ndërkohë që Shqipëria është një prej vendeve që ka vuajtur më shumë migrimin neto pas viteve `90, numri i emigrantëve që jetojnë në Shqipëri nuk është i papërfillshëm.
Sipas të dhënave të përditësuara të Organizatës së Kombeve të Bashkuara, e që i referohen vitit 2017, në vendin tonë jetonin plot 52 mijë e 484 shtetas të huaj. Në krahasim me vitin 2015, shifra ka pësuar një rritje të lehtë me rreth 400 të huaj.
Por, në krahasim me 2010 dhe të gjitha vitet e tjera paraardhëse, përfshirë 1990-ën, shifra është bindshëm më e ulët. Të huajt që jetojnë në Shqipëri përbëjnë vetëm 1.8% të totalit të popullsisë.
Në krahasim me vendet e tjera të rajonit, kjo është norma e dytë më e ulët, pas Bosnjë Hercegovinës, ç`ka do të thotë se, Shqipëria ka qenë dhe vijon të mbetet më pak e preferuara në rajon nga emigrantët e huaj.
Nga ana tjetër, ndërkohë që, shqiptarët janë dyndur masivisht për azil në dyert e Europës, një pjesë e vogël refugjatësh dhe azilkërkuesish duket se kanë përfunduar në vendin tonë.
Gjithsej janë 1387 për vitin 2017 thotë Organizata e Kombeve të Bashkuara, ose vetëm 2.6% e totalit të të huajve që jetojnë në Shqipëri. Në krahasim me vitin 2015 rritja është e ndjeshme.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.