Paguhen 225 milionë dollarë detyrime ndaj bizneseve – Rimbursimi i TVSH-së, 2021-shi arrin shifrën më të lartë!
Përgjatë gjithë vitit që lam pas, tatimet kanë paguar ndaj bizneseve në total 24,11 miliardë lekë TVSH të rimbursuar apo 255 milionë dollarë. Vlera e disbursuar rezulton ndër më të lartat e tre viteve të fundit, ndërkohë që tatimet kanë marrë përsipër të mos krijojnë më vonesa për shlyrjen e këtij detyrimi. Sipas të dhënave më të fundit të administratës tatimore, vetëm në tremujorin e fundit të vitit janë rimbursuar rreth 3,35 miliard lekë Tatim mbi Vlerën e Shtuar.
Shifra rezulton më e ulëta ndër tremujorët e mëparshëm, ku më së shumti janë shlyer në tremujorin e dytë. Të dhënat nga tatimet, tregojnë se në tremujorin e katërt të 2021-shit rreth 860 milionë lekë e vlerës së rimbursuar shkoi për pagesën e kësteve për tatimpaguesit e mëdhenj në listën e tatimpaguesve me këste, ndërsa numëri i kërkesave FIFO të miratuara dhe rimbursuara gjatë kësaj periudhe ka qënë në total 286 me vlerë rreth 2,49 miliard lekë .
Në fund të tremujorit të katërt të 2021, stoku i rimbursimit të TVSH-së kapi vlerën rreth 480 milionë lekëve, duke shënuar një rënie me 95 % krahasuar me stokun në fund të tremujorit të katërt 2020. Referuar të dhënave, akumulimet e krijuara kundrejt bizneseve kanë pësuar një rënie të vazhdueshme nga një tremujor në tjetrin, duke u afruar drejt zerimit të tyre, ndërkohë që viti 2020 u mbyll me një stok prej 9.8 miliardë lekësh.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.