Paketa anti-shpifje, gazetarët kundër – Çipa, të tërhiqet menjëherë. Mazhoranca: Portalet anonime problem për shtetin e qytetarët

Shoqatat e gazetarëve janë pozicionuar tërësisht kundër ndryshimeve në dy ligje e njohur si paketa anti-shpifje, duke i kërkuar Kuvendit tërheqjen e saj.  Kreu i Unionit të Gazetarëve Aleksandër Çipa ka paraqitur të martën qëndrimin e prerë të shoqatave në seancën e parë të konsultimit publik lidhur me paketën anti-shpifje. Sipas shoqatave, paketa i jep AKEP-it dhe AMA-s atribute thuajse gjyqësore, duke vendosur vetë për mbylljen, penalizmin apo gjobitjen e subjekteve mediatike sipas dëshirave të tyre.

Ndërkohë që deputetët e mazhorancës e argumentuan nevojën për ndryshime ligjore me faktin që shumë portale janë tërësisht anonime, dhe se në mënyrë të papërgjegjshme apo të qëllimshme përhapin lajme false apo godasin individë të caktuar.  Sipas tyre, është e pamundur të kërkosh të drejtën e shkelur një një portal anonim, ndërkohë që disa prej tyre janë të regjistruar jashtë kufijve dhe nuk ka asnjë të dhënë mbi identitetin e subjekteve që i kanë në pronësi.

Por nga ana e përfaqësuesve të shoqatave të gazetarëve ky pretendim u rrëzua me argumentin se çdo subjekt është i detyruar të regjistrojë domainin përkatës tek AKEP, i cili edhe ka mbyllur disa portale deri tani. Paketa antishpifje është vënë nën akuzë për cënim të lirisë së medias dhe tashmë është në fazën e konsultimit me grupet e interesit.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.