Panairi “Shqipëria punon Tokën” hapet nesër – Do të ekspozohen produktet shqiptare në 31 bashki të vendit
“Shqipëria punon Tokën” është panairi që do të startojë të mërkurën në orën 10 në sheshin Nenë Tereza, ku pjesë do të jenë 31 bashki të vendit për të ekspozuar produktet shqiptare. Janë rreth 600 ekspozitorë të ndarë në disa kategori: Të rinjtë sipërmarrës në bujqësi, Agroindustri, Verëra, alkool, Agroturizëm, Fruta-perime, Blegtori, Produkte shtëpie – tradicionale.
Produktet shqiptare që do të ekspozohen, do të përcillen tek njerëzit, nën skenografinë e vendit ku prodhohen. Gjithashtu pranë këtij panairi do të gjeni një arenë të manifestimit te kulinarisë shqiptare ku mjeshtrat e kuzhinës dhe restorantet, do të ofrojnë mundësinë e degustimit të recetave më të spikatura.
Risia e këtij panairi do të jetë hapësira që do t’u dedikohet të rinjve dhe sipërmarrësve të rinj, në sektorin bujqësor dhe blegtoral. Në panair do të gjeni informacion për skemat mbështetëse dhe të gjithë instrumentet e financimit, asistencë në hartimin e planeve të biznesit, këndin e mjeteve bujqësore, këndin e të rinjve si dhe këndin e gatimit ku do të gjeni gatimet tona tradicionale.
Pjesë e këtij panairi do të jenë edhe fermerët, blegtorët dhe sipërmarrësit e trojeve shqiptare jashtë kufirit, si Kosova dhe Maqedonia.
Panairi i iniciuar nga kryeministri Rama, Ministria e Bujqësisë dhe Zhvillimit Rural dhe Dhoma e Tregtisë dhe Industrisë, do të jetë i hapur deri më 30 Nëntor, ora 13:00.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.