Presidenti kthen ligjin për gjendjen civile, Meta: “Ka pasoja ligjore dhe politike. Krijon kaos në hartimin e listave të zgjedhësve”

Presidenti  i republikës, Ilir Meta kthen në Kuvend ligjin për  ‘Për gjendjen civile’, të ndryshuar” me arsyetimin se ka pasoja ligjore dhe politike. Pas studimit të ligjit Meta arrin në konkluzionin se Kuvendi i Shqipërisë, nuk ka zgjedhur mënyrën më të mirë dhe të balancuar për të materializuar arritjen e qëllimit që synon përmes kësaj ndërhyrjeje legjislative të bërë në këtë formë.

“Një ndryshim i tillë, në këtë fazë të procesit zgjedhor ka potencialin për të krijuar kaos në hartimin e listave të zgjedhësve, në procesin e votimit dhe për pasojë, do të minonte edhe më shumë besueshmërinë e vet procesit zgjedhor në tërësi duke sjellë pasoja politike, nxitjen e kontestimeve administrative dhe gjyqësore dhe për pasojë acarimin e jetës shoqërore në vend. Ndërhyrja e papritur në ligjin bazë të gjendjes civile siç propozohet, duke e vlerësuar ndikimin e qenësishëm që mund të ketë në procesin zgjedhor, nuk është në momentin e përshtatshëm dhe do të ketë pasojë ligjore dhe politike.”

Ndërkohë ligji nr. 130/2020, objekt shqyrtimi në nenin 1 të tij, parashikon se: “Në nenin 74, në pikën 1, shkronja “ç” shfuqizohet.”Pra sipas kësaj ndërhyrje shkelja ose mosrespektimi i dispozitës së përcaktuar në pikën 3, të nenit 15, që dënohej me gjobë, në masën 10 000 lekë, dhe me pezullim të shërbimit deri në vjeljen e gjobës, të cilën e vendos dhe e vjel nëpunësi i gjendjes civile, shfuqizohet. Presidenti shton më tej se dispozita që pretendohet të shfuqizohet, është një rregullim i sjellë si paketë ndër disa rregullime të tjera.

Nertila Doko / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.