Prodhojnë vetëm për shtresat e ulëta! – Importi i mobilierive mbizotëron “tregun luksoz”, 80% e lëndës së parë vjen nga jashtë
Përpunimi i drurit dhe prodhimi i mobilieve është një sektor shumë i rëndësishëm në vendin tonë që ka njohur zhvillim të konsiderushëm në 15 vitet e fundit dhe i është nënshtruar një procesi transformimi të plotë, jo vetëm në strukturën dhe organizimin e ndërmarrjeve, por edhe në llojin e lëndëve të para të përdorura për prodhimin e objekteve druri me një gamë më të madhe zgjedhjesh.
Sipas një studimi të bërë nga Ministria e Bujqësisë dhe GIZ, ndërsa industria numëron rreth 7 mijë punonjës dhe 1500 biznese, ajo plotëson një pjesë të konsiderueshme të nevojave të tregut vendas shqiptar me produkte druri që synojnë kryesisht produkte me kosto të ulët për klientët me të ardhura të ulëta, ndërsa importi vazhdon dhe zgjerohet kryesisht për mobilie moderne të klasit të lartë. Sipas studimi në këtë aspekt, problemet që duhen trajtuar në industrinë shqiptare të prodhimit të drurit nuk lidhen vetëm me sasinë dhe kapacitetin, por edhe me cilësinë dhe koston e prodhimit.
Në dokument thuhet se kompanitë prodhuese janë kryesisht të vogla dhe të mesme, që operojnë me një numër të vogël punonjësish dhe duke qënë se tregu i mobilieve është një treg i maturuar, kjo gjendje rrit domosdoshmërinë e prodhimit të produkteve të drurit që janë më cilësore për të përballuar një konkurrencë gjithnjë e më të ashpër dhe për të gjetur tregje të reja veçanërisht në Ballkan, por që në këto kushte kjo duket mundësi e largët.
Konkurrenca, niveli i ulët i përpunimit të produktit, niveli i ulët i kualifikimit të stafit dhe kushtet teknike të makinerive të përdorura, thuhet në dokument, nuk e lejojnë këtë industri të përmirësohet dhe zgjerohet më tej. Ndërkaq, më shumë se 80 për qind e lëndëve të para, kryesisht panele me bazë druri për industrinë vendase të mobilieve, importohen, gjë që sjell ndikim negativ për përpunuesit vendas.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.