Pse po anulohet marrëveshja Shqipëri-Gjermani për financimin e ndërmarrjeve të vogla e të mesme? Relacioni i nismës në Kuvend

Qeveria shqiptare ka depozituar në Kuvend një nismë ligjore që anulon një marrëveshje të vitit 2015 me qeverinë gjermane, për financimin e ndërmarrjeve të vogla e të mesme në zonat rurale dhe urbane, faza e dytë.

Anulimi i kësaj marrëveshje bëhet me konsensus të të dy palëve dhe vjen si një zgjidhje për një ngërç të krijuar në skemën e dhënies së ndihmës që e ka bërë këtë marrëveshje të pazbatueshme ende. Ky akt shoqërohet nga një zgjidhje alternative për ngërçin, ku pala gjermane ka propozuar një projektmarrëveshje të re për bashkëpunimin financiar, që shoqërohet nga një shumë financimi në vlerë 5 milion euro.

Projekti i financimit të ndërmarrjeve të vogla e të mesme ishte parashikuar të zbatohej përmes sistemit bankar por pas një studimi të kryer në fund të vitit 2016 e në fillim të vitit 2017, ka rezultuar se në Shqipëri, pengesa më e madhe në dhënien e kredive nuk ishte mungesa e mjeteve financiare të bankave por mungesa e garancive nga ana e SME-ve.

Në këto kushte, rruga që do të ndiqej ishte ajo e zgjedhjes së një instrumenti tjetër, Fondi i Garancisë së Kredive Rurale (RCGF).

“Por ky instrument nuk mund të zbatohej sepse nuk ishte i parashikuar në kushtet e marrëveshjes, të miratuar në ligjin nr.86/2015. Në këto kushte, kjo marrëveshje nuk u zbatua kurrë dhe nuk ka pasur asnjë disbursim fondesh” shkruhet në relacion.

Në këto kushte, Qeveria e Republikës Federale të Gjermanisë ka planifikuar sikurse është përcaktuar edhe në protokollin e konsultimeve qeveritare gjermano-shqiptare mbi bashkëpunimin për zhvillim, datë 12 dhjetor 2017, të vërë në dispozicion në kuadër të bashkëpunimit financiar përmes bankës gjermane për rindërtim KfW,  një shumë financimi në vlerën 5 000 000 (pesë milionë) euro, për projektin “Promovimi i ndërmarrjeve të vogla dhe të mesme përmes Fondit të Garancisë së Kredive Rurale (RCGF)”.

Realizimi i këtij projekti kushtëzohet nga lidhja e një marrëveshjeje të re, ndërmjet qeverisë së Republikës Federale të Gjermanisë dhe Këshillit të Ministrave të Republikës së Shqipërisë.

“Në mënyrë që këto mjete financiare të mund të disponohen sërish, Republika Federale e Gjermanisë propozon : Anulimin me dakordësi të ndërsjellë të marrëveshjes së nënshkruar në datën 6 korrik 2015, ndërmjet Këshillit të Ministrave të Republikës së Shqipërisë dhe qeverisë së Republikës Federale të Gjermanisë, për bashkëpunimin financiar 2010, të miratuar me ligjin nr.86/2015, “Për ratifikimin e marrëveshjes, ndërmjet Këshillit të Ministrave të Republikës së Shqipërisë dhe qeverisë së Republikës Federale të Gjermanisë, për bashkëpunimin financiar 2010, për projektin “Rifinancimi i ndërmarrjeve të vogla dhe të mesme në zonat urbane dhe rurale, faza e dytë” shkruhet në relacion.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.