Rama në Sofje – Pjesë e takimit mes vendeve të BE dhe Ballkanit Perëndimor
Kryeministri, Edi Rama po merr pjesë në Samitin mes Bashkimit Europian dhe Ballkanit Perëndimor. Ndërkohë që, përmes një viedo të publikuar prej tij në rrjetin social ‘Facebook’ duket se paraprakisht ai ka zhvilluar takime me krerët e këtyre vendeve.
Në mbërritje të tij, shefi i qeverisë shqiptare është pritur nga kryeministri i Bullgarisë, Bojko Borisov, vendi që aktualisht mban Presidencën e Këshillit Europian.
Bashkimi Evropian dhe gjashtë vendet e Ballkanit Perëndimor, pritet të miratojnë në këtë samit një deklaratë për përmirësimin e lidhjeve infrastrukturore si dhe për përmirësimin e sigurisë, luftën kundër radikalizmit dhe migrimit.
Deklarata do të jetë pjesa përmbyllëse e takimit të lartë ndërmjet këtyre vendeve, ndërkohë që ky dokument synon të rikonfirmojë ardhmërinë evropiane të vendeve të rajonit.
Pritet që deklarata përfundimtare t’u referohet vendeve të Ballkanit perëndimore si “partnerë”, një kompromis i pranuar edhe nga Spanja, e cila përballë problemit të Katalonjës, ka ashpërsuar gjuhën e saj kundrejt Kosovës.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.