Referendumi i mbetjeve, Kuvendi ka parashikuar votimin në seancën e 16 nëntorit

Kuvendi i Shqipërisë ka parashikuar që të votojë në seancën plenare të datës 16 Nëntor kërkesën e deputetëve të Partisë Demokratike për zhvillimin e referendumit për importin e mbetjeve.

Komisioni i Ligjeve “zhbllokoi” projektvendimin duke e depozituar në Kuvend në datën 29 Shtator. Deri më këtë datë, referendumi ishte cilësuar si i panevojshme nga ana e mazhorancës, për shkak se ligji për importin e mbetjeve ishte tërhequr.

Në rast të miratimit të këtij projektvendimi nga ana e parlamentit me shumicë të thjeshtë, shqiptarët do t’i drejtohen kutive të votimit për t’iu përgjigjur me po ose jo pyetjes: “A duhet të lejohet importi i mbetjeve në territorin e Shqipërisë?”

Historiku i këtij referendumi është i gjatë, me qëndrimin e palëve që të alteruar me ndryshimin e pushtetit. Debati zuri vend në publik në vitin 2011, pas publikimit të projektligjit të qeverisë së asokohe për menaxhimin e integruar të mbetjeve. Pas mbledhjes së firmave nga qytetarët dhe gjykimit pro kushtetues nga Gjykata Kushtetuese, presidenti Nishani kishte caktuar datën 22 Dhjetor për mbajtjen e referendumit.

Por pas ndryshimit të pushtetit, qeveria e drejtuar nga PS dhe LSI argumentoi se votimi ishte i panevojshëm pasi projektligji do të tërhiqej.

Tre vjet më pas, grupi parlamentar i PD mblodhi firmat e nevojshme të deputetëve për të zyrtarizuar në Kuvend nismën për ndalimin e importit të mbetjeve. Prej atëherë, projektvendimi  ka mbetur në sallat e kuvendit, ndërsa vetëm një muaj më parë, qëndrimit të PD iu bashkua edhe Lëvizja Socialiste për Integrim, përmes një deklarate mbështetëse të Petrit Vasilit.

Në rast të miratimit në Kuvend do të ishte referendumi i tretë pas vitit ’90. I pari ishte ai në vitin 1994 për kushtetutën e vendit, ndërsa i dyti në vitin 1997, kur u votuar për zgjedhjen e formës së regjimit.

PD argumenton ndalimin e importit të mbetjeve me arsyen se mund të cënojë eficiencën e riciklimit në vend, lë hapësira të hapura për krimin, si dhe dëmton imazhin e turizmit, bujqësinë, agrobiznesin dhe del kundër vizionit të zhvillimit të ekonomisë.

Angelo Haruni/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.