Rikthehen vizat?! – Avramopoulos: Komisioni Europian merr vendimin në fund të vitit
Rikthehen ethet në vendet e rajonit sa i përket regjimit të vizave. Rritja e emigracionit me mbi 50%, si dhe rritja e kërkesave për azil me mbi 50%, janë dy nga faktorët që do të detyronin Komisionin Europian që të rikthente vizat.
Kësaj situate nuk i shpëton as Shqipëria e cila, ashtu si vendet e tjera duhet të pres fundin e vitit që të njihet me rezultatin e monitorimit.
Komisioneri i BE-së Dimitris Avramopoulos u shpreh se pavarësisht masave që po merren në mbrojtje të kufijve nga emigrimi ilegal, duhet të mbrohet mobiliteti sa i përket qytetarëve të ndershëm.
Gjatë Ministerialit Bashkimi Europian-Ballkani Perëndimor për Çështjet e Brendshme, Ministri Fatmir Xhafaj është shprehur se i kanë shpallur luftë pa kompromis krimit të organizuar. Ndërkohë që vetëm nga aksionet e 9 muajve të fundit janë sekuestruar rreth 18 milionë euro.
Shqipëria ka nënshkruar tre marrëveshje me BE-në sa i përket një plani të përbashkët kundër terrorizmit për Ballkanin Perëndimor, monitorim për drogën si dhe marrëveshjen për mbrojtjen e kufijve me asistencën e agjentëve të FRONTEX.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.