Rindërtim i Urës problematike të Tapizës – Hapet tenderi me vlerë mbi 151 milion lekë (FOTOT)
Autoriteti Rrugor Shqiptar ka njoftuar hapjen e tenderit për rindërtimin e urës problematike të Tapizës. Ura e Tapizës ndodhet nё segmentin rrugor Tiranë – Shkodër, afro 30km larg Tiranës, pikërisht nё një ndër linjat kryesore rrugore nё Shqipëri, pasi lidh veriun me jugun e vendit, dhe fluksi i trafikut ditor/vjetor nё kёtё rrugë ёshtё mjaft i lartё.
Duke parë problematikat më të mëdha që vihen re në këtë urë, shkaku kryesorë i humbjes së qëndrueshmërisë së saj është ndryshimi i rrjedhjes së lumit për shkak të bllokimit të hapësirave të urës, çka sjell që lumi të gërryejë më shumë dhe të ekspozojë pilotat poshtë pilave, çka mund të sjellë humbjen e qëndrueshmërisë totale të pilës dhe për rrjedhojë të kampatave në të dyja anët e urës duke e bërë atë të pakalueshme, shkruhet në njoftimin e tenderit.
Fondi limit i këtij tenderi është 151.539.896,39 lekë ndërsa kohëzgjatja e kontratës ose afati kohor për ekzekutimin: 12 muaj.
Sipas njoftimit të ARRSH në Agjencinë e Prokurimit Publik, afati kohor për dorëzimin e ofertave ose kërkesave për pjesëmarrje është data 10/08/2020, ora: 14:00.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.